Италийн Турин хотод болсон Тусгай олимпын дэлхийн өвлийн наадам гуравдугаар сарын 8-16-ны өдрүүдэд болж, Монгол Улсын баг тамирчид 5 алт, 10 мөнгө, 6 хүрэл, нийт 21 медаль хүртэн түүхэн амжилт тогтоолоо. Энэ нь тус наадмын түүхэнд Монголын баг тамирчид нэг дор ийнхүү олон медаль хүртсэн анхны тохиолдол юм.

Монгол Улсын 24 тамирчин (эрэгтэй 8, эмэгтэй 16) зургаан төрлөөр оролцож, дэлхийн хэмжээний амжилт үзүүлсэн нь энэ оны спортын онцлох үйл явдлуудын нэг боллоо.

Тусгай олимпын наадамд амжилттай оролцсон баг тамирчдад өнөөдөр Биеийн тамир, спортын улсын хороо (БТСУХ), Монголын тусгай олимпын хороо, “Скай ресорт” ХХК-аас хүндэтгэл үзүүлэв.

Арга хэмжээний үеэр БТСУХ-ны Гадаад харилцаа, мэдээллийн технологийн хэлтсийн дарга Н.Оюунбат:
"Тусгай олимпын дэлхийн өвлийн наадамд бахдам амжилт байгуулсан тамирчин Та бүхэндээ халуун баяр хүргэе. Эх орныхоо нэрийг дэлхийд цуурайтуулж, ард түмнийхээ хайр хүндэтгэлийг хүлээсэн бахархалт тамирчиддаа талархаж байна" хэмээн онцоллоо.

Олон улсын үйл ажиллагаанд Монгол Улс оролцлоо

Наадмын үеэр Монгол Улсыг төлөөлөн, Зэвсэгт хүчний жанжин штабын Цэргийн биеийн тамир, спортын тасгийн ахлах ахлагч Г.Наранхүү галт бамбарыг буухиалах ёслолд оролцсон байна.

Мөн Дэлхийн удирдагчдын эвслийн амжилтын замнал дээд хэмжээний хэлэлцүүлэгт:

• Монголын тусгай олимпын хорооны элч Б.Ерөөлт,
• Чиглүүлэгч Н.Эрдэм,
• ССАЖЗЯ-ны сайд Ч.Номин,
• БТСУХ-ны ГХМТХ-ийн дарга Н.Оюунбат нар оролцож, “Берлины тунхаглал”-ын явц болон хүртээмжтэй нийгэм байгуулах асуудлаар хэлэлцүүлэг өрнүүлжээ.

Тус наадмын хүрээнд тамирчдын бие бялдрын хөгжлийг дэмжих, гэр бүл, асран хамгаалагчдад зориулсан соёл, спортын танин мэдэхүйн хөтөлбөрүүд зохион байгуулагдсан байна.