Улаанбурхан өвчний 11 дэх тохиолдол лабораторийн шинжилгээгээр батлагдлаа. Тухайн өвчтөн 2025 оны гуравдугаар сарын 1-4-ний өдрүүдэд Баянзүрх дүүргийн Нэгдсэн эмнэлэгт хэвтэн эмчлүүлж байсан байна. Эрүүл мэндийн байгууллагууд өвчний тархалтыг хянах, илүү өргөн хүрээнд сэргийлэх арга хэмжээг авч эхэлжээ.

Энэхүү өвчин нь амьсгалын замаар дамждаг, халдварлах чадвар өндөр тул эцэг, эх, асран хамгаалагчид хүүхдийнхээ эрүүл мэндэд анхаарч, товлолын дагуу улаанбурханы эсрэг вакцинд бүрэн хамруулах шаардлагатайг ХӨСҮТ-өөс зөвлөж байна. Вакцинжуулалтад хамрагдаагүй эсвэл товлолын хугацаанаас хоцорсон тохиолдолд өрх, сумын эрүүл мэндийн төвд хандан нөхөн дархлаажуулалтад хамрагдах боломжтой.

Мөн улаанбурхан өвчтэй хүний хавьталд орсон иргэдэд дараах зөвлөмжийг өгч байна:

• Өвдөөгүй, өвдсөн эсэхээ мэдэхгүй, эсвэл улаанбурханы эсрэг вакцинд хамрагдсан эсэхээ тодорхойгүй бол ХӨСҮТ-ийн сайн дурын дархлаажуулалтын кабинетаар вакцинд хамрагдах
• Хэрэв халуурсан, тууралт гарсан, эсвэл өвчтэй хүнтэй хавьталд орсон бол ХӨСҮТ-ийн яаралтай тусламжийн тасгийн 1, 2-р өрөөнд үзлэг хийлгэх, шаардлагатай бол вакцинжуулалтад хамрагдах

Эрүүл мэндийн байгууллагууд улаанбурхан өвчний тархалтыг хязгаарлахын тулд идэвхтэй хяналт, дархлаажуулалтын ажлыг үргэлжлүүлэн хэрэгжүүлж байгаа бөгөөд иргэдийг халдвараас сэргийлэх арга хэмжээнд хамрагдахыг уриалж байна.

Эх сурвалж: ХӨСҮТ