Монголын “The MongolZ” баг албан ёсоор Монгол Улсын үндэсний шигшээ багийн бүрэлдэхүүнд нэгдлээ. Үүний үр дүнд Засгийн газраас тус баг болон электрон спортын хөгжлийг иж бүрэн дэмжих боломж бүрдэж байна.

Электрон спорт 2023 онд БНХАУ-ын Ханжоу хотноо болсон “Ханжоу 2022” Азийн 19 дүгээр наадамд анх удаа дөрвөн төрлөөр хөтөлбөрт багтсан бол 2026 онд Японы “Айчи-Нагояа 2026” зуны 20 дугаар наадамд найман төрлөөр багтахаар болоод байна.

“The MongolZ” баг сүүлийн жилүүдэд Азийн “Counter-Strike 2” төрлийн бүх рекордыг эвдэж, дэлхийн чансаанд 3 дугаарт эрэмбэлэгдэж байна. Улмаар Монгол Улсын нэрийг олон улсын тавцанд өндөрт өргөж, түүх бүтээсээр буй тус багийн гишүүдэд Засгийн газраас талархал илэрхийллээ. Цаашид электрон спортын төрөл, шигшээ багийн бүрэлдэхүүнийг өргөжүүлж, төрийн зүгээс дэмжлэг үзүүлэх чиглэлээр анхааран ажиллахаа мэдэгдэв.

“The MongolZ” баг удахгүй эх орноосоо мордож, “ESL Pro League Season 21” тэмцээн болон Швед, Дани, АНУ, Австрали, Румын зэрэг улсуудад зохион байгуулагдах олон улсын чансаа өндөртэй тэмцээнүүдэд өрсөлдөх гэж байна.