Билгийн тооллын XVII жарны “Элдэв эрдэнэт” хэмээх хөхөгчин модон могой жилийн сар шинийн баярт зориулсан хүчит бөхийн барилдаанд улс, аймаг, цэрэг, сумын цолтой нийт 256 бөх зодоглохоор бүртгүүлжээ.

Энэ удаагийн барилдаанд дархан аварга нэг, улсын аварга хоёр, арслан дөрөв, гарьд нэг, заан 10, харцага 17, начин 32 буюу улсын цолтой 67 бөх магнайлан барилдана. Хэрэв бүртгүүлсэн бөхчүүдээс хүндэтгэх шалтгаанаар зодоглох боломжгүй болсон тохиолдолд чансаагаар нь аймгийн арслан Д.Аззаяа (700), аймгийн заан О.Доржсамбуу (700), аймгийн харцага Н.Ширчинхүү (650), аймгийн заан Х.Бөхбаяр (600), аймгийн харцага Ж.Дэлгэрсайхан (600) нарыг нөхөн барилдуулах юм.

Барилдаан өнөөдөр 13:00 цагт эхэлж, эхний хоёр даваа явагдана.

Өмнөх жилийн сар шинийн барилдааны дүн

• "Хилэнт эх" хэмээх луу жилийн барилдаанд улсын аварга О.Хангай түрүүлж, улсын заан Б.Пүрэвсайхан үзүүрлэж байв.

• Туулай жилийн барилдаанд улсын заан Б.Бат-Өлзий түрүүлж, дархан аварга Н.Батсуурь үзүүрлэжээ.

• Усан бар жилийн барилдаанд улсын начин Э.Мөнхжаргал аймгийн заан цолтойдоо түрүүлж, заан Б.Пүрэвсайхан үзүүрлэсэн бөгөөд Э.Мөнхжаргал нь сар шинийн барилдаанд аймгийн заан цолтой түрүүлсэн анхны бөх болсон юм.

Сар шинийн баярт зориулсан сүүлийн 10 жилийн барилдаанд улсын аварга Ч.Санжаадамба, заан Б.Бат-Өлзий нар тус бүр хоёр удаа түрүүлсэн амжилтыг үзүүлсэн байна.

Эх сурвалж: Монголын үндэсний бөхийн холбоо