Билгийн тооллын XVII жарны “Элдэв эрдэнэт” хэмээх хөхөгчин модон могой жилийн сар шинийн баярт зориулсан Монгол үндэсний бөхийн барилдаан Швейцарын Женев хотод болжээ.

Энэхүү барилдааныг Монголын үндэсний бөхийн холбооны Европ дахь салбар болон Монгол Улсаас Швейцарын холбооны улсад суугаа Элчин сайдын яам хамтран зохион байгуулсан бөгөөд Европын хэд хэдэн улсаас бөхчүүд зодоглосон байна.

Барилдаанд Архангай аймгийн Өгийнуур сумын харьяат, залуу бөх Т.Өгий түрүүлж, Сэлэнгэ аймгийн Ерөө сумын харьяат, сумын заан Ц.Бат-Эрдэнэ үзүүрлэв. Их шөвөгт Сэлэнгэ аймгийн Мандал сумын харьяат Т.Баасанбат, Архангай аймгийн Өлзийт сумын харьяат Б.Чанрав нар шалгарчээ. Харин дунд шөвөгт Увс аймгийн Давст сумын харьяат, Улаанбаатар хотын уугуул, сумын заан Д.Жамсрандорж, Архангай аймгийн Чулуут сумын харьяат, сумын заан Г.Баасанжаргал нар үлдсэн байна.

Барилдаанд түрүүлсэн бөх 500, үзүүрлэсэн бөх 300, их шөвөгт шалгарсан бөхчүүд 200 еврогийн шагнал гардан, алт, мөнгө, хүрэл медалиар энгэрээ мялаав.

Тус барилдаанд уран гараа, дэвээтэй бөхийн тусгай шагналыг Увс аймгийн Хяргас сумын харьяат, 65 настай ахмад бөх, сумын заан В.Төмөрбаатар хүртсэн бол уран барилдааны шагналыг Сэлэнгэ аймгийн Мандал сумын харьяат залуу бөх Т.Баасанбат гардан авчээ. Тэрбээр гурван цолтой бөхийг өвдөг шороодуулсан амжилтаар онцлог байв.

Өсөх ирээдүйтэй бөхөөр дархан аварга Ж.Мөнхбатын нэрэмжит Европын аварга шалгаруулах анхдугаар тэмцээний өсвөрийн бөхийн 2024 оны аварга, Булган аймгийн Хутаг-Өндөр сумын харьяат, М.Билгүүдэй тодорсон байна.

Багийн халз барилдаанд БНЧУ-аас оролцсон "Чех" баг тэргүүн байр эзэлсэн бол ахмад бөхчүүдийн ангилалд Увс аймгийн Давст сумын харьяат, Улаанбаатар хотын уугуул, сумын заан Д.Жамсрандорж, өсвөр бөхийн ангилалд Увс аймгийн Малчин сумын харьяат, Швейцар улсын уугуул С.Квинтен нар түрүүлжээ.

Эх сурвалж: Монголын үндэсний бөхийн холбоо, Элчин сайдын яам.