Улаанбурхан нь вирусээр үүсгэгддэг цочмог халдварт өвчин бөгөөд агаар дуслын замаар буюу халдвартай хүн ханиаж, найтаах төдийд бусдад маш амархан халдварладаг. Бага насны хүүхдүүд уг өвчнөөр өвчилсөн тохиолдолд хүндрэх, улмаар эндэх эрсдэл өндөртэй байдаг.

Улаанбурхан өвчин хэр аюултай вэ?

Энэхүү өвчин нь халдварлах чадвараараа хамгийн өндөрт ордог халдварт өвчний нэг бөгөөд халдварлалтын индекс 96-98% байдаг. Өвчилсөн 5 хүн тутмын 1 нь хүндрэх эрсдэлтэй байна.

Улаанбурхан өвчний үед илрэх шинж тэмдгүүд:

• Халуурах
• Нүдний салст улайх, үрэвсэх
• Хамраас нус гоожих
• Ханиалгах
• Амны салстад улаан хүрээтэй цагаан толбо үүсэх
• Нүүрнээс эхлэн бүх биед тархах толбон гүвдрүүт тууралт гарах

Улаанбурхан өвчин дараах хүндрэлүүдийг үүсгэж болзошгүй:

• Уушгины хатгаа
• Тархины гэмтэл (эргэн сэргэхгүй байж болзошгүй)
• Сонсгол алдагдах, дүлийрэх
• Дутуу төрөх
• Хүүхэд бага жинтэй төрөх
• Эндэх эрсдэлтэй

Хэн өвдөх эрсдэлтэй вэ?

• Вакцинд хамрагдаагүй
• Өмнө нь улаанбурхан өвчнөөр өвдөөгүй
• Бүх насны хүн өвдөх магадлалтай

Улаанбурхан өвчнөөс хэрхэн сэргийлэх вэ?

Хамгийн үр дүнтэй арга бол вакцин хийлгэх явдал юм.

• Хүүхдэд 9 сартай, 2 настайд улаанбурхан өвчнөөс сэргийлэх вакциныг 2 удаа хийдэг.
• Вакциныг хугацаанд нь тариулаагүй бол өрх, сумын эмнэлэг, дүүргийн эрүүл мэндийн төвд хандаж вакцин хийлгэх шаардлагатай.