Улсын гуравдугаар төв эмнэлэгт (УГТЭ) тархины гүний байрлалтай хорт хавдартай 80 настай өвчтөнд амжилттай мэс засал хийжээ. Өвчтөн одоо эрүүл саруул болсон байна.

Энэ төрлийн мэс заслыг гадаад улсад хийлгэвэл зөвхөн хагалгааны төлбөр 100 мянган ам.доллар хүрдэг бол Монголд амжилттай хийгдэх болсноор гадаадад эмчлүүлэх шаардлагатай өвчтөнүүдийн урсгал багасаж, дотооддоо эмчлэгдэх боломж нэмэгдэж байна.

Тархины мэс заслын шинэ боломжууд

• 2023 онд тус эмнэлэг 1,878,
• 2024 онд 2,150 хүн мэдрэлийн мэс засалд оржээ.
• Эдгээрийн 15 орчим хувь нь тархины гүний хорт хавдартай өвчтөнүүд байна.
• 2019 оноос хойш ийм оноштой 130 хагалгааг амжилттай хийсэн.

Эмнэлгийн хөгжүүлэлтийн зорилтууд
Эрүүл мэндийн яамнаас мэргэжилтнүүдийг гадаадад сургах, эмчилгээнд шаардлагатай тоног төхөөрөмжийг сайжруулах гэсэн хоёр үндсэн чиглэлээр ажиллаж байгаа юм.

Саяхан Туркийн American болон Koç University эмнэлгүүдэд Монголын эмч, сувилагчдын баг тархины гүний хавдар болон тархины дурангийн мэс заслын чиглэлээр нарийвчилсан сургалтанд хамрагдсан байна.

Оношилгоо сайжирч, амьдралын чанар дээшилж байна
Сүүлийн жилүүдэд тархины хорт хавдрын оношилгоо эрс сайжирч, өвчтөнүүдийг цаг алдалгүй оношилж, шаардлагатай эмчилгээг хийх боломжтой болж байна. Эрүүл мэндийн салбарын хөгжлийн энэхүү ахиц дэвшил нь эдийн засгийн дарамтыг бууруулах, иргэдийг дотооддоо бүрэн эмчлэх нөхцөлийг бүрдүүлж байгааг салбарын мэргэжилтнүүд онцолж байна.