Хоёрдугаар сарын 14-16-ны өдрүүдэд зохион байгуулсан "Мөсөн сурын олон улсын аварга шалгаруулах-2025" тэмцээнд Баян-Өлгий аймгийн Булган сумын харьяат, спортын мастер Рэнцэнбямбын Батзориг тэргүүлж, мөсөн сурын улсын мэргэн цол хүртлээ.
Энэхүү тэмцээнд ОХУ-ын Буриад, Тува, Халимаг, БНХАУ-ын ӨМӨЗО-ы Шилийн гол, Ордос, Шинжаан Уйгурын харваачид болон Монгол Улсын 21 аймаг, 9 дүүргээс 700 гаруй харваач, 54 баг оролцож, цэц мэргэнээ сорьжээ.
Тэмцээнийг дараах зургаан төрлөөр зохион байгуулсан байна:
- Насанд хүрэгчдийн цуваа харваа
- Багийн харваа
- Ахмадын цуваа харваа
- Хүүхдийн харваа
- Сонирхогчдын харваа
- Эмэгтэй саранбай
Насанд хүрэгчдийн цуваа харвааны төрөлд Цагдаагийн ерөнхий газрын Хүч спорт хороо, Дотоодын цэргийн 805-р ангийн харваач, спортын мастер Рэнцэнбямбын Батзориг тэргүүлж, Монголын Мөсөн сурын холбооноос улсын мэргэн цол хүртсэн байна.
Эх сурвалж: Монголын Мөсөн сурын холбоо
