Монголчуудын уламжлалт баяр Цагаан сар гуравдугаар сард тохиох бөгөөд энэ нь менингококкт халдварын дэгдэлтийн оргил үе юм. Тиймээс баярын бэлтгэл хийх, золголт хийхдээ халдвар хамгааллын дэглэм сахихыг эрүүл мэндийн байгууллагаас зөвлөж байна.
Сэргийлэх арга хэмжээ:
- Олон хүн цугларсан газарт бага насны хүүхдийг дагуулж явахаас зайлсхийх
- Золгохдоо бага насны хүүхдийг үнсэхгүй байх
- Амны хаалт зүүх, гараа халдваргүйжүүлэх
- Ам, хоолойг давс, нимбэг, сод, сармисны уусмалаар зайлах
- Гэр орноо тогтмол агааржуулах
Менингококкт халдварын онцлог:
Энэхүү халдвар нь агаар дуслын замаар дамждаг бөгөөд 36-37 хэмийн дулаан, чийгтэй орчинд нянгийн үржил идэвхждэг. Ихэвчлэн сургуулийн өмнөх насны хүүхдүүд болон дархлаа султай хүмүүс өвчлөх эрсдэлтэй байдаг.
Судалгаагаар, манай улсад менингококкт халдвар авсан хүмүүсийн 84% нь 0-14 насны хүүхдүүд байгаа тул бага насны хүүхдүүдийн эрүүл мэндийг хамгаалах нь чухал гэдгийг мэргэжилтнүүд анхааруулж байна.
