Нийслэлийн ИТХ, НЗДТГ, Монголын Үндэсний Мөсний шагайн холбоо хамтран уламжлалт мөсний шагайн харвааг хөгжүүлэх, залгамж үеийг бэлтгэх, олон нийтэд сурталчлах зорилгоор энэхүү тэмцээнийг анх удаа зохион байгуулж байна.
Тэмцээнд төвийн 6 дүүргийн 300 гаруй иргэн оролцож, нийт 189 багийн 378 сонирхогч мэргэнээ сорин өрсөлдөж байна. Баг бүр хоёр хүний бүрэлдэхүүнтэй бөгөөд хамгийн өндөр оноотой таван баг энэ сарын 22-нд Үндэсний цэцэрлэгт хүрээлэнд аваргаа шалгаруулах юм.
Монгол Улсын Үлэмж Дархан мэргэн Д.Ууганбаярын хэлснээр, мөсний шагайн харваа нь Чингис хааны үед хүртэл тэмдэглэгдсэн, 300 гаруй жилийн түүхтэй уламжлалт наадгай бөгөөд орчин үед өвлийн спортын төрөл болон хөгжиж байна. Харваа нь нүдний хараанд сайнаар нөлөөлөхөөс гадна дунджаар 20 сум харвахад 5-6 км алхсантай дүйцэх хөдөлгөөн шаарддаг аж.
Оролцогчдын нэг, Хан-Уул дүүргийн иргэн Б.Батсайхан "Өмнө нь нэг удаа харваж байсан ч өнөөдөр анх удаа тэмцээнд оролцож байна. Мөсний шагай идэр есийн хүйтэнд болдог нь эр хүний тэсвэр тэвчээрийг сорьдог онцлогтой" хэмээн сэтгэгдлээ хуваалцжээ.
Тэмцээн Туул, Дунд, Сэлбэ, Улиастайн гол дээр үргэлжилж, энэ сарын 22-нд өндөрлөх юм.
Эх сурвалж: НЗДТГ-ын ХМОНХХ
