Испанийн Эзэн хааны хөл бөмбөгийн холбооны (RFEF) ерөнхийлөгч асан Луис Рубиалесийг шүүх хурал Мадридын ойролцоох Сан-Фернандо-де-Энарес хотод даваа гарагт эхэллээ.
Бэлгийн хүчирхийллийн хэрэг
2023 оны Хөл бөмбөгийн эмэгтэйчүүдийн ДАШТ-д түрүүлсэн Испанийн шигшээ багийн алтан медаль гардуулах ёслолын үеэр Рубиалес багийн хагас хамгаалагч Женнифер Эрмосогийн уруул дээр үнссэн нь бэлгийн хүчирхийлэл гэж үзэж, түүнийг эрүүгийн хэрэгт холбогдуулсан. Мөн тэрбээр "харилцан зөвшөөрсний үндсэн дээр үнссэн" гэх мэдэгдэл хийлгэхээр Эрмосог шахсан гэх хэрэгт буруутгагдаж байна.
Шүүх хурлын үеэр Ж.Эрмосо мэдүүлэг өгөхдөө өөрийг нь үнсэхийг огт зөвшөөрөөгүй гэдгээ баталжээ.
Шүүхэд татагдсан бусад хүмүүс
Л.Рубиалесаас гадна дараах хүмүүс Эрмосод дарамт үзүүлсэн гэх хэрэгт холбогдон шүүгдэж байна:
- Хорхе Вильда – Испанийн эмэгтэйчүүдийн шигшээ багийн дасгалжуулагч асан
- Альберт Луке – RFEF-ийн спортын асуудал эрхэлсэн захирал асан
- Рубен Ривера – RFEF-ийн Маркетингийн хэлтсийн захирал асан
Ялын шаардлага
Прокуроруудын зүгээс Луис Рубиалест 2 жил 6 сарын хорих ял оноох саналыг шүүхэд хүргүүлсэн. Испанийн хуулийн дагуу, 2 хүртэлх жилийн хорих ялаар шийтгэгдсэн хүмүүс хохирлоо барагдуулсан, урьд өмнө ял шийтгэлгүй бол хорих ялыг биеэр эдлэхгүй байж болох юм.
2023 оны арваннэгдүгээр сард ФИФА-гийн Сахилга батын хороо Рубиалесийг 3 жилийн хугацаанд хөл бөмбөгтэй холбоотой үйл ажиллагаа эрхлэхийг хориглосон шийдвэр гаргажээ.
Үнсэлттэй холбоотой дуулиан
2023 оны наймдугаар сарын 20-нд ДАШТ-ний финалд Английн шигшээг ялсан Испанийн эмэгтэй хөлбөмбөгчдөд шагнал гардуулах үеэр Л.Рубиалес Женнифер Эрмосогийн уруул дээр үнссэн нь хөл бөмбөгийн ертөнцөд асар их дуулиан тарьсан.
Үүний дараа 80 гаруй хөлбөмбөгчид, үүнд ДАШТ-д оролцсон 23 тамирчин багтаж, Рубиалес огцрохгүй бол Испанийн шигшээ багт тоглохгүй гэдгээ мэдэгдсэн. Эцэст нь, Рубиалес тамирчдаас уучлал хүсэж, 2023 оны есдүгээр сарын 10-нд огцрох өргөдлөө өгсөн байна.
Эх сурвалж: DW
