БНХАУ-ын Харбин хотноо болох Азийн өвлийн IX наадам хөшгөө нээхэд долоо хоногийн хугацаа үлдлээ. Энэ удаагийн наадамд 34 орны 1275 тамирчин биатлон, гүйлтийн цана, кёрлинг, уулын цана, уран гулгалт, снөүборд, хоккей, тэшүүр, шорт трейк, фристайл, цанаар авирах зэрэг 11 төрлийн 64 зай, ангилалд өрсөлдөхөөр эцсийн мэдүүлгээ өгөөд байна.
Монгол Улс энэ удаагийн наадамд дөрвөн спортын долоон төрөлд 35 тамирчнаа илгээж байна. Тус тэмцээний олон оролцогчтой спортын төрөл болох шайбтай хоккей, кёрлингийн тэмцээн ирэх сарын 3-нд эхлэх бөгөөд манай улсын кёрлингийн холимог хосын төрөлд Б.Баяр, Г.Энхзаяа нар өрсөлдөж, Монголын багийн салхийг хагална. Тэд Япон, Кувейт, Хонконг, Тайванийн багуудтай нэг хэсэгт багтаж, эхний тоглолтоо ирэх сарын 3-нд хийх юм.
Монгол Улсыг төлөөлөх баг тамирчид
Гүйлтийн тэшүүр
- Б.Төгөлдөр
Шорт трейк
- М.Борхүү
- Г.Мөнх-Эрдэнэ
- Э.Мөнх-Эрдэнэ
- Б.Гэрэлтуяа
Уран гулгалт
- О.Мишээл
- Г.Марал-Эрдэнэ
Кёрлинг
- Б.Баяр
- Г.Энхзаяа
Уулын цана
- Ц.Тэмүүлэн
- А.Ариунбат
- О.Өсөх-Ирээдүй
- Х.Халиун
- Э.Тэмүүлэн
- А.Итгэл
- А.Сондорбаяр
- М.Инжин
Гүйлтийн цана
- М.Нандинцэцэг
- Б.Ачбадрах
- О.Золбаяр
- Д.Мөнхгэрэл
- А.Хүслэн
- Ц.Золбаяр
- А.Энхтуул
- Б.Номин-Эрдэнэ
- Э.Ариунтунгалаг
- Т.Ариунболд
Биатлон
- М.Должинсүрэн
- Ж.Гантулга
- Д.Энхчимэг
- Х.Эрдэнэтунгалаг
- Б.Анхболд
- Э.Энхсайхан
- Х.Сумъяа
- О.Гантулга
Азийн өвлийн IX наадмын зохион байгуулалт
БНХАУ-ын Харбин хот энэ удаагийн өвлийн наадмыг 29 жилийн дараа хоёр дахь удаагаа зохион байгуулж байгаа бөгөөд тус улс нийтдээ гурав дахь удаагаа өвлийн Азийн наадмыг хүлээн авч байна. Азийн олимпын зөвлөлийн ивээл дор зохион байгуулдаг энэ тэмцээн 1986 онд Японы Саппоро хотод анх зохиогдож, түүнээс хойш Японд дөрөв, БНСУ-д нэг, Казахстан болон Хятадад тус бүр хоёр удаа зохион байгуулагдаж байжээ.
Монгол Улсын баг тамирчид өмнө нь “Саппоро-1990” Азийн өвлийн спортын наадмаас эрэгтэйчүүдийн гүйлтийн цанын буухиа төрлөөр анхны хүрэл медалиа хүртэж байсан. Үүний дараа “Чанчүн-2007” наадамд уулын цанын чөлөөт гулгалтаар хүрэл, “Астана, Алматы-2011” наадмаас бөмбөгтэй хоккейн баг мөнгө, цанын зүг чиг олох уралдааны төрлөөр дөрвөн хүрэл медаль хүртэж, нийт нэг мөнгө, зургаан хүрэл медальтай болсон амжилттай байна.
