29 жилийн дараа дахин Хятадын Харбин хотноо зохион байгуулагдах эл наадам нь 34 орны 1500 гаруй тамирчныг оролцуулан 11 спортын 64 төрлөөр өрнөх гэж байна. Оролцогчдын тоо өмнөх наадмуудаас давсан үзүүлэлттэй байгаа нь онцлох үзүүлэлт юм.

Энэ удаагийн наадамд уулын цана, биатлон, гүйлтийн цана, кёрлинг, уран гулгалт, фристайль цана, хоккей, шорт трек, тэшүүр, снөүборд болон цанаар авирах зэрэг спортын төрлүүд багтжээ. Цанаар авирах спорт анх удаагаа Азийн өвлийн наадмын хөтөлбөрт багтаж байгаа нь энэ наадмыг онцгой болгож байна.

Монгол Улсаас 80 тамирчин биатлон, тэшүүр, шорт трек, уран гулгалт, кёрлинг, уулын цана, гүйлтийн цанын төрлүүдэд оролцохоор бэлтгэлээ хангаж байгаа юм. Кёрлинг, уран гулгалтын төрлөөр Монголын тамирчид Азийн өвлийн наадамд анх удаа өрсөлдөх гэж буй нь түүхэн үйл явдал болж байна.

Энэхүү наадмыг “Өвлийн мөрөөдөл, Ази тивийн хайр” уриан дор зохион байгуулж, бэлгэдэл сахиусаар Бинбин болон Нини нэртэй Сибирийн барнуудыг сонгожээ. Наадмын медалийн нүүрэн талд мөсөн зам дээр уран чадвар гарган гулгаж буй өвлийн спортын тамирчныг Азийн өвлийн наадмын эмблемийн хамт дүрсэлсэн бол медалийн ар талд Харбин хотын эргэн тойрон дахь үзэсгэлэнт байгаль сийлсэн байна.

Харбин хот нь БНХАУ-ын зүүн хойд хэсэгт байрладаг бөгөөд өвлийн аялал жуулчлал, соёлын үйл ажиллагаагаараа алдартай “Мөсөн хот” хэмээн алдаршжээ. Тус хотод өвөлдөө -20 хэм хүрч хүйтэрдэг бөгөөд дэлхийн хамгийн том цас, мөсний фестивалийг зохион байгуулдаг. Жил бүр уг фестивалийг үзэхээр сая сая жуулчин Харбин хотыг зорьдог байна.

Энэ удаагийн наадам нь зөвхөн спортын төдийгүй Ази тивийн эв нэгдлийг бэлгэдсэн өргөн цар хүрээтэй арга хэмжээ болох юм.