Кино урлагийн хамгийн муу бүтээлүүдийг тодруулдаг “Алтан бөөрөлзгөнө” наадмын хамгийн олон төрөлд “Joker: Folie a Deux” уран сайхны кино нэр дэвшжээ.
2019 онд тэрбум долларын ашиг олж байсан “Joker” киноны хоёрдугаар анги “Хамгийн муу кино”, “Хамгийн муу үргэлжлэл кино” зэрэг долоон номинацид нэр дэвшсэн байна.
Түүнчлэн “Joker”-ын эхний ангид бүтээсэн дүрээрээ “Оскар”-ын “Гол дүрийн шилдэг эрэгтэй жүжигчин”-ий шагнал хүртэж байсан Хоакин Феникс “Хамгийн муу эрэгтэй жүжигчин” төрөлд, дуучин Леди Гага “Хамгийн муу эмэгтэй жүжигчин” төрөлд нэр дэвшжээ.
“Joker 2” нь өмнөх ангиасаа хавьгүй их зардлаар бүтсэн боловч 200 сая долларын орлого олсон нь өмнөх киноныхоо нийт орлогын дөнгөж тавны нэг орчимтой тэнцсэн байна. Мөн шинжээчдийн зүгээс ширүүн шүүмжлэл хүлээжээ.
Үүнээс гадна “Megalopolis”, “Madame Web” кинонууд энэ удаагийн наадамд тус тус зургаан төрөлд нэр дэвшсэн байна.
