Өчигдөр УИХ-ын чуулганы нэгдсэн хуралдаан болсонгүй. Хуралдаан болоогүй шалтгаан нь УИХ-ын гишүүд, сайд нар Шанхайд болж байгаа Хятадын олон улсын экспод явсантай холбоотой. Энэ сарын 5-нд эхэлсэн экспод очихын тулд Ерөнхий сайд нэг өдрийн өмнө ниссэн. Түүнтэй хамт УИХ. Засгийн газрын хоёр гаруй гишүүн явсан байна.

Энэ шалтгаанаар өчигдөр хуралдах ёстой байсан УИХ-ын нэгдсэн чуулган хуралдсангүй. Чуулганаар ирэх 2025 оны төсвийн төслийн эцсийн хэлэлцүүлгийг хийх ёстой байсан ч Шанхайн экспогоос бол чуулганыг хойшлуулж, өнөөдөр хуралдуулахаар болжээ. Төсвийн эцсийн хэлэлцүүлэг явж байхад Ерөнхий сайд нь танхимынхаа гишүүдийг аваад олон улсын экспо үзэхээр дөрөв хоногоор явчихсан. Бүр хоёрын хоёр Шадар сайдаа дагуулаад шүү дээ. Салбар хариуцсан сайд, төсвийн ерөнхийлөн захирагч нар нь байхгүй учраас Байнгын хороодын хуралдаан дээр гишүүдийн асуултад хариулах эзэн хүн байхгүй, өөрөө өөртэйгөө ярьсаар хэлэлцүүлгийг дуусгах жишээтэй. 

Албан ёстой мэдээллээр Ерөнхий сайд БНХАУ-ын Төрийн зөвлөлийн Ерөнхий сайд Ли Чянтай албан ёсны уулзалт хийж, экспогийн нээлтэд үг хэлэх ёстой байсан гэнэ. Гэвч үүний төлөө бүтэн дөрвөн өдрийг зарцуулна гэдэг байж болох уу? Албан ёсны ёсны уулзалтаа хийчихээд ганцхан цаг нисээд ирэх газар. Хоёрын хоёр шадар сайдынхаа нэгийг нь үлдээчихээд ирж болно шүү дээ. Л.Оюун-Эрдэнэ ганцаараа бүгдийг хийдэг юм бол Эдийн засгийн хөгжлийн сайд тэнд ямар үлийгээ хийж яваа юм. Онцгой байдлын сайдын хэрэг тэнд юу байсан юм... гэх мэтчилэн.

Тэгээд хийсэн ажил нь үзэсгэлэн үзлээ, тунельтэй танилцлаа, "Алибаба", "Huawe"-д зочиллоо. Бүр нэг хийх ажилгүй. Араар нь оруулж ирсэн төсөв нь зуун задгай, жаран хагархай. Төсвийг эргүүлэн татья гээд гишүүд гарын үсэг цуглуулаад эхэлчихсэн. Гарын үсэг цуглуулсан МАН-ын гишүүдийг намаас нь хөөнө барина гэж сүрдүүлсэн дуулдах. Зарим дээр нь цагдаагийн байгууллага хэрэг нээгээд эхэлчихсэн мэдээ ч байна. Сангийн сайд нь "Оруулж ирсэн төсөвт өөрчлөлт оруулахгүй" гэж мэдэгдэл хийгээд, Төсвийн байнгын хороонлы дарга нь "Замын нохой хуцаж л байдаг, засгийн ажил явж л байдаг" гэж доромжлоод. 

Иймэрхүү хариуцлага, ёс суртахуунтай, ийм ажлын арга барилтайгаар хамтарсан Засгийн газар хол явахгүй. Огцруулах асуудал яригдаад эхэлчихлээ. Гэхдээ ийм болтол нь явах сонирхол Ерөнхий сайдад өөрт нь байсан бол бүр яах вэ? 

Б.МАНДАХ