Америкийн Liberty Media компанийн эзэмшил дэх “Формула-1” авто уралдаан /F1/ ба Францын тансаг зэрэглэлийн бүтээгдэхүүн үйлдвэрлэгч LVMH компани 10 жилийн хамтын ажиллагааны гэрээ байгуулжээ. Энэ түншлэл дараагийн F1 улиралд албан ёсоор эхэлнэ.
Энэ бол LVMH, F1 хоёр хамтран ажилласан анхны тохиолдол биш юм. “F1 өнгөрсөн оны Лас-Вегасын Гран-При тэмцээний үеэр LVMH-ийн нэг брэндтэй хамтран ажилласан бөгөөд уг ажил амжилттай болсон” гэж Liberty Media-гийн ерөнхийлөгч бөгөөд гүйцэтгэх захирал Грег Маффей хэлжээ.
LVMH нь Louis Vuitton, Moet Hennessy, TAG Heuer зэрэг брэндүүдийг эзэмшдэг бөгөөд түншлэлийн хүрээнд эдгээр брэнд Формула-1-тэй хамтран ажиллах ажээ. Хамтын ажиллагааны талаарх илүү дэлгэрэнгүй мэдээллийг 2025 онд өгөхөөр төлөвлөж байгаа бөгөөд хэвлэлийн мэдээнд санхүүгийн нарийн ширийн мэдээллийг дурдсангүй.
Liberty Media 2017 онд F1 уралдааны эрхийг худалдаж авснаар нэр хүнд нь эрс өссөн юм. 2019 онд Netflix платформоор “Formula 1: Drive to Survive” цуврал гарсан нь F1-ийг сонирхогчдын хүрээг тэлэхэд тус дөхөм болжээ. Дараагийн Гран-При тэмцээн аравдугаар сарын 20-нд АНУ-ын Техас муж улсын Остин хотод болно.
