Монголын Зохиолчдын эвлэлийн гишүүн, Г.Сэр-Одын нэрэмжит шагналт яруу найрагч, сэтгүүлч Д.Гансаруулын үргэлжилсэн үгийн “Хандолин”, “Мадриана, тэнүүлчин хоёр” туужийн хос номын нээлт өнөөдөр /204.09.23/ “Аз хур” номын их дэлгүүрт болно.
Яруу найрагч Д.Гансаруул яруу найргийн “Зүрхний нандин эмзэг уяа”, “Саранд гандсан хөшиг”, “Сарны тосгон”, “Цоохор майлзын түүх” түүврүүдийг хэвлүүлсэн. Харин энэ удаагийн хос ном нь түүний үргэлжилсэн үгийн анхны бүтээлүүд юм.
“Хандолин”, “Мадриана, тэнүүлчин хоёр” ном нь триллер, гэмт хэрэг, детектив төрлийн туужуудаас бүрджээ. Д.Гансаруул нь 2019 оноос үргэлжилсэн үгээр бичиж эхэлсэн бөгөөд шинэ номд орсон туужуудыг 2019-2020 онд фэйсбүүк хуудастаа цувралаар бичиж уншигчдад хүргэжээ.
Д.Гансаруул нь детектив, триллер, акмейст чиглэлийн шүлгүүд бичдэг. Түүний “Чамаар гоёно” хэмээх триллер шүлэг олон нийтийн сүлжээнд хэдийнээ танигдсан. Найрагч өнгөрөгч онд Хойд Македонийн Струга хотноо зохиогдсон “Struga Poetry Evenings” наадамд эх орноо төлөөлж оролцжээ.
Яруу найрагч хүний эрхийг хөхиүлэн дэмждэг, 2020 онд "Азийн хүний эрхийн шагнал" хүртсэн хүний эрхийн төлөө тэмцэгч. Одоогоор мобайл журнализм, хиймэл оюун ухаанд суурилсан “Mojo AI” медиа агентлагийн захирлаар ажиллаж байна.
