Увс аймгийн Баруунтуруун суманд мэргэжлийн сүмо бөхийн Маэгаширагийн нэгд эрэмлэгдэн Токүсэгава нэртэйгээр барилдаж байсан сүмоч, аймгийн арслан Б.Ганболдын нэрэмжит сүмо бөхийн өсвөрийн аварга шалгаруулах “Алдартны гараа” тэмцээн энэ сарын 14-15-нд болно.
Тэмцээн 2022, 2023 онд болж байсан бөгөөд өмнөх тэмцээнээс шалгарсан гурван хүүхдийг япон улсад 100 хувийн тэтгэлэгээр сургажээ. Тэгвэл энэ жилийн тэмцээнээс шалгарсан 1-2 хүүхдийг японы “Asahigaoka” ахлах сургуульд суралцуулах юм. Б.Ганболд нь мэргэжлийн сүмод Кирияма дэвжээнд харьяалагдан 2010 оны гуравдугаар сараас макүчи зиндаанд дэвшиж, 2011 оны тавдугаар сард зодог тайлсан билээ. Тэрбээр 2012 оны Баян-Өлгий аймгийн баяр наадам түрүүлж, аймгийн арслан цол хүртсэн юм.
