Мадридын “Реал” багт тоглодог Украины хаалгач Андрей Лунин, Испанийн “Валенсия”-д тоглодог Гүржийн хаалгач Георгий Мамардашвили нар оны шилдэг хаалгачид олгодог Лев Яшины нэрэмжит шагналын төлөө өрсөлдөх хөлбөмбөгчдийн жагсаалтад багтжээ. Энэ тухай уг шагналыг 2019 онд санаачилсан France Football сэтгүүлийн Х сүлжээн дэх хуудсанд мэдээлсэн байна.

Шагнал горилогчдын жагсаалтад багтсан 10 шилдэг хаалгачийг нэрлэвэл: Диогу Кошта (Португал, "Порту"), Жанлуижи Доннарумма (Итали, "ПСЖ"), Грегор Кобель (Швейцар, "Боруссия", Дортмунд), Андрей Лунин (Украин, "Реал", Мадрид), Майк Меньян (Франц, "Милан"), Георгий Мамардашвили (Гүрж; "Валенсия"), Эмилиано Мартинес (Аргентин; "Астон Вилла"), Унаи Симон (Испани, "Атлетик", Бильбао) Ян Зоммер (Швейцар, "Интер"), Ронвен Уильямс (ӨАБНУ, "Мамелоди Сандаунс") нар юм.

Өнгөрсөн онд Л.Яшины шагналыг хүртсэн шилдэг тамирчин бол Английн “Астон Вилла” багт тоглож буй Аргентины хаалгач Эмилиано Мартинес юм.

ЗХУ-ын хөл бөмбөгийн шигшээ багийн хаалгач, домогт Лев Яшин бол 1956 оны Олимпын аварга, 1960 оны Европын аварга бөгөөд Олон улсын хөл бөмбөгийн холбооноос /ФИФА/ гаргасан хувилбараар XX зууны шилдэг хаалгачаар шалгарсан юм. Мөн хаалгач нарын дотроос “Алтан бөмбөг” /1963 он/ шагналыг хүртсэн цорын ганц хүн билээ. 

2023/2024 оны улирлын шилдэг хаалгачийн шагнал гардуулах ёслол 10 дугаар сарын 28-ны өдөр Парис хотын Шатле театрт болно.