2024 оны Пауэрлифтинг Өсвөр, Залуучуудын ДАШТ Мальта улсад энэ сарын 28-наас есдүгээр сарын наймны хооронд зохион байгуулагдаж байна. Энэхүү тэмцээнд дэлхийн өнцөг булан бүрээс 750 гаруй тамирчин оролцож байгаа юм. 

Манай улсын хувьд энэхүү тэмцээнд гурван тамирчин оролцож байгаа бөгөөд өчигдөр буюу тэмцээний эхний өдөр “SBD Strength” клубийн тамирчин, спортын мастер M.Балжинням -74 кг-ийн төрөлд 207.5 кг шахаж, улмаар аваргын алтан медалийн тавцан дээр зогслоо. 

Түүгээр ч зогсохгүй, суулт 255 кг IV байр, таталт 250 кг IV байранд шалгарч, нийлбэр дүнгээр 712.5 кг өргөж, давхар мөнгөн медаль хүртсэн юм.

Тэрээр ийнхүү Монголын Пауэрлифтингийн спортын түүхэнд залуучуудын Пауэрлифтингийн ДАШТ-ээс нийлбэр дүнгээр медаль хүртсэн анхны тамирчин болж, түүхэн амжилтыг бүтээж буй нь энэ. 

Түүний дасгалжуулагч багшаар Монголын Пауэрлифтингийн холбооны болон олон улсын шүүгч, “SBD Strength” клубийн багийн ахлагч ОУХМ С.Минжбаатар болон Б.Дүвжид нар ажилладаг юм. Харин ирэх арваннэгдүгээр сард Исланд Улсад зохиогдох насанд хүрэгчдийн ДАШТ-д дасгалжуулагчид нь өөрсдөө оролцох тул бэлтгэл сургуулилтын хуваариас шалтгаалан тэд энэ удаа Мальта улсыг зорьж чадаагүй аж. Тэгсэн ч боломж бололцоогоо ашиглан, бэлтгэл болон тэмцээний турш тасралтгүй гар утсаараа дүрст дуудлага хийж, тамирчнаа дасгалжуулсаар аваргын тавцан дээр зогсож, төрийн дууллаа эгшиглүүлэхэд нь тусалжээ.

Тамирчин М.Балжинням болон багш дасгалжуулагч, багийн гишүүд, Монголын Пауэрлифтингийн спортыг сонирхогч бүх залуустаа халуун баяр хүргэхийн сацуу тэмцээнд оролцож буй бусад тамирчдадаа амжилт хүсье.