Олон Улсын Олимпын Хорооны чуулган өнөөдөр нээлтээ хийлээ.

Чуулганаар ОХУ болон Беларусийн баг тамирчдын эсрэг ямар арга хэмжээ авах нь олны анхаарлыг татаж буй. Тэгвэл Төвийг Сахисан багийн /AINs/ тамирчдыг олимпын нээлтийн ёслолд оролцуулахгүй болсноо зарлалаа.

Түүнчлэн олимпод оролцох тамирчдын тоонд хязгаарлалт тогтоожээ.

Одоогоор Оросын 12, Беларусийн долоон тамирчин цагаан тугийн дор оролцох эрхээ авсан бол цаашид оросуудыг 58, Беларусьд 28 эрхээс хэтрүүлэхгүй байхаар болсон аж.

Өмнө "Токио 2020" зуны олимпод Оросын 330 тамирчин Олимпын Баг (ROC) нэрээр оролцож байсан юм.

Мөн олимпод оролцох тамирчныг төвийг сахисан байр суурьтай байхыг хатуу анхааруулж байна. Түүнчлэн тамирчдыг шалгахаар тусгай баг байгуулжээ.

Энэ багийг ОУОХ-ны дэд тэргүүн Никол Хоевертц ахалж, ёсзүйн зөвлөлийг төлөөлөн нэрт сагсан бөмбөгчин Пао Газоль, тамирчдын зөвлөлөөс олимпын аварга, БНСУ-ын Рю Мин Сын нар багтжээ.

Энэ багийн хийх үндсэн үүрэг нь олимпод оролцох эрх авсан Орос, Беларусь тамирчдын хувийн мэдээллийг шалгах тэднийг сэтгэл санаагаар дэмжих болон ОУОХ-ны тавьсан шаардлагыг биелүүлж буй эсэхэд анхаарах аж.