МАН-ын дарга нарын тэнэгрэл бүр хэрээс хэтэрлээ. Хэрээс хэтэрсэн тэнэгрэл юунд хүргэдэг вэ, өөрсдийнхөө толгойг л цустдаг даа.

Өчигдөр Хууль зүй, дотоод хэргийн сайд Б.Энхбаяр Тээврийн цагдаагийн албаны дарга Б.Оюутболдыг ажлаас чөлөөлж, арга хэмжээ авахыг ЦЕГ-ын даргад үүрэгджээ. Шалтгаан нь ТЦА-ны дарга өмнөх өдөр нь ХУД-т замын хөдөлгөөний урсгалыг зохицуулахдаа “Нийслэлийн Засаг даргад урьдчилж танилцуулалгүйгээр ара хэмжээ авч, иргэдийг бухимдуулсан” гэсэн байна. Мөн ТЦА-наас хөдөлгөөний ачааллыг бууруулахаар явуулсан “туршилтыг зогсоосон” гэж мэдэгджээ.

Миний л мэдэхээр иргэд лав “Хөдөлгөөнийг зохиулахдаа хотын даргад мэдэгдэх ёстой байсан” гэж бухимдаагүй. Тэр байтугай “Хотод гарч байгаа аливаа зохицуулалтаас хотын аль болох хол байгаасай, хуруу гараа татаасай” гэж залбирдаг болсон. Харин “Цагийг нь тулгаж мэдэгдлээ, нэг өдрийн өмнө хэлэхэд яадаг юм” энэ тэр гэж үглэсэн байж бол магадгүй. Угаасаа энэ хотод болж бүтдэг юм байхаа болиод удаж байгаа.

Гэлээ гээд “Хотын даргад мэдээлсэнгүй” гээд хууль сахиулагчид арга хэмжээ авдаг хууль байхгүй. Хууль зүйн сайд бол хуулиа л мөрдүүлэх үүрэгтэй.

Тухайлбал, Замын хөдөлгөөний аюулгүй байдын тухай хуулийн 8-р зүйлд цагдаагийн байгууллагын эрх, үүргийг заахдаа “Замын хөдөлгөөнд оролцогчийн хэвийн, аюулгүй зорчих нөхцөлийг хангах зорилгоор замын хөдөлгөөнийг зохицуулах, хөдөлгөөнийг зохион байгуулах, урсгал, чиглэлийг түр өөрчлөх, хязгаарлах, хаах эрхтэй” гээд заачихсан.  Энэ дагуу 12-ны орой хөдөлгөөний ид ачааллын үед Төв шуудангаас Тэмээтэй хөшөөний уулзвар хүртэл хойноос урагш чиглэж буй 2км замын хөдөлгөөний хоёр эгнээг гурав, арагшаа чиглэх хөдөлгөөнийг нэг урсгалтай болгож зохицуулсан. Ингэхдээ иргэдэд иргэдэд, хотын даргад урьдчилан танилцуулсангүй гэж буруутгажээ.

Ингэхэд замын хөдөлгөөний энэ зохицуулалт бол захиргааны шийдвэр биш. Хуулиар хүлээсэн эрх, үүргийнхээ хүрээнд хийж байгаа хөдөлгөөний зохицуулалт. Зам дээр осол гарлаа гэхэд хотын даргаас зөвшөөрөл авч хөдөлгөөн хязгаарладаггүй биз дээ. Х.Нямбаатар гэдэг хүнээс зөвшөөрөл авах, гарын үсэг зуруулах шаардлагагүй. Тэгээд ч иргэдэд урьдчилан мэдээлсэн (хөдөлгөөний урсгалыг өөрчлөхөөс 10 минутын өмнө) энэ зохицуулалтыг хотын дарга мэдээгүй байсан гэдэг бүр худлаа.

Хоёрдугаарт, эд нарыг хот удирдахаас өмнө, аль эртнээс хийгээд ирсэн хөдөлгөөний зохицуулалтыг “Туршилт байсан, туршилтыг зогсоосон” энэ тэр гэж сүржигнэх нь өөрөө элэг хатаам зүйл. Ийм үг, үйлдлээр иргэдээс оноо авна гэж бодож байгаа улстөрчид өөрсдөө жинхэнэ “хошин шог” харагдаж байна. Харин ч аль эртнээс ингэж зохицуулах ёстой байсныг хэтэрхий хоцорч хийлээ.

Э.Бат-Үүлийг хотын дарга байх үед Яармагийн гүүр бас яг ингэж нэг талын түгжрэлд ордог байсан. Тэр үед хотын дарга өөрөө шийдвэр гаргаад, өглөө, оройдоо хөдөлгөөний урсгалыг яг ийм байдлаар зохицуулдаг байсан. Өнөөдөр хөдөлгөөний ачаалал тэр үеэс хэд дахин нэмэгдсэн, түгжирдэг цэгүүд нь ч олон болсон. Тийм болохоор энэ зохицуулалтыг өдөр тутам хийж байх ёстой. Хотын дарга өөрөө хийх ёстой ажлыг цагдаагийн байгууллага чиг үүргийнхээ хүрээнд хийсэн нь буруутах үндэслэл болохгүй.

Зодуулсаар байгаад сүүлдээ зодох нь хүртэл хайр болдог гэдэг шиг МАН-ын дарга нарын энэ тэнэгрэл явсаар нийгмийн, нийтийн үзэл болох шинжтэй. Өчигдөр орой үзүүлсэн "Монгол коммент"-ын хоёр "ТЦА-наас хийсэн зохицуулалтыг Түгжрэлийн сайд нь мэдээгүй байжээ" гээд нүд амаа эргэлдүүлж суухыг хараад нүүр хийх газаргүй болов. Түгжрэлийн эсрэг юу ч хийгээгүй Түгжрэлийн сайд түгжрэлийг чадах ядахаараа зохицуулж байгаа цагдаагийн алба хаагчид арга хэмжээ авах шалтгаан болох юм гэнэ.

Дахиад хэлэхэд, энэ бол туршилт биш. Захиргааны шийдвэр бүр биш. Х.Нямбаатар гэдэг хүн өмнө нь нэг удаа нийтийн тээврийн маршрутыг өөрчилж, нийслэлчүүдийг дүн өвлийн хүйтнээр гурав хоног явган гүйлгэхдээ тэр шийдвэрээ албажуулаагүй байсан. Иргэд шийдвэрийг нь эсэргүүцээд, гомдол гаргаад явсан чинь “Туршилт байсан” гэж хэлээд хариуцлагаас мултарсан. Энэ хулгайгаа дахиад давтана, өөрөө хийгээгүй бурууг өрөөлд тохно гэвэл бүтэхгүй. Цагдаа ямар чиний "мешок" юм уу?

Б.ЗАЯА