Уруул дээр хомхой үүсгэдэг  вирус хүний тархинд удаан хугацааны гэмтэл учруулдаг ажээ. Энэхүү нээлт нь хөгшрөлтийн үеийн тархины эмгэгийг эмчлэх шинэ арга зам олоход тус болох магадлалтай хэмээн молекулын нейробиологийн профессор Рут Ицхаки Conversation сайтад бичсэн байна.

Тэрбээр "Дэлхий даяар 30 сая гаруй хүн сэтгэцийн олдмол өвчин болох Альцхеймерээр шаналж байна. Харамсалтай нь энэ өвчин бүрэн эмчлэгддэггүй бөгөөд зөвхөн өвчний шинж тэмдгийг хөнгөлөх эм бий.

Гэвч судалгааны үр дүн Альцхеймер өвчнийг эмчлэх арга байгааг харуулж байна. Хомхойн вирус Альцхеймер өвчний шалтгаан байж магадгүй юм.

Энэ нь тархины эмгэгийг эмчлэхийн тулд өндөр үр нөлөөтэй вирусийн эсрэг аюулгүй эм бэлдмэл хэрэглэх шаардлагатай гэсэн үг. Магадгүй бид хүүхдүүдэд Альцхеймерийн өвчнөөс сэргийлэх тарилга хийж болох юм.

Хомхойн вирусыг олон жилийн өмнө олж нээсэн. Хүүхдүүдийн ихэнх нь бага насандаа энэ вирусээр халдварладаг бөгөөд ихэвчлэн захын мэдрэлийн системд үлддэг. Хүн стресст өртөх, дархлаа нь сулрах, өөр халдварын улмаас тархи нь гэмтэх үед вирус идэвхжиж, уруул дээр хомхой долоодог ажээ.

Хөгшрөлтийн явцад дархлааны систем сулардаг тул хомхой үүсгэгч энгийн герпесийн  вирус-1  ихэвчлэн настай хүмүүсийн тархинд нэвтэрдэг байна.

1991 онд бид хөгшин настай олон хүний тархинд энгийн герпесийн  вирус-1  байсныг тогтоосон. Харин 1997 онд APOE4  хэмээх гентэй хүмүүс тархиндаа уг вирусыг тээж байвал  Альцхеймерээр өвдөх эрсдэл бий болдгийг тогтоосон юм.

Түүнчлэн APOE4  гентэй болон тархиндаа хомхойн энгийн герпесийн  вирус-1-ийг тээгч  хүмүүсийн Альцхеймерээр өвдөх магадлал ийм ген болон вирусгүй хүнийхтэй харьцуулахад 12 дахин өндөр байдаг.

Бид зөвхөн хомхойн вирус болон Альцхеймерийн өвчин хоорондын хамаарлын тухай судалсан бөгөөд одоогоор уг вирус энэ өвчний гол шалтгаан болохыг бүрэн нотлоогүй байна" гэлээ.

Эх сурвалж: BBC