"Эрдэнэт” үйлдвэрийн 49 хувийн хувьчлал, “Хөтөл цемент шохой" үйлдвэр, Дарханы төмөрлөгийн үйлдвэрийн концессын гэрээ зэрэгтэй холбоотой хэргийн шүүх хурлын урьдчилсан хэлэлцүүлэг Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд өнөөдөр эхэллээ.

Уг хэрэгт 20 хүн, хоёр хуулийн этгээд яллагдагчаар татан шүүж байна. Тодруулбал, Сангийн сайд асан Б.Болор, Аж үйлдвэрийн сайд асан Д.Эрдэнэбат, Үндсэн хуулийн Цэцийн гишүүн асан Ц.Нанзаддорж, Д.Доржханд, Б.Минжбадам, Д.Ганбат, Л.Санжаадорж, Г.Ганзориг, Д.Батжавхлан, Р.Мөнхтуул, Д.Эрэвгийлхам, Б.Мөнхсоёл, Д.Энхтунгалаг, Д.Сугар, О.Орхон, Н.Батбаяр, Ц.Пүрэвтүвшин, Ч.Энхболд, Э.Шижир, С.Уранчимэг нарын 20 хүн, “Төмөр замын зураг төслийн институт” ХХК, “Кью Эс Си” ХХК нарын хоёр хуулийн этгээд шүүхийн урьдчилсан хэлэлцүүлэгт оролцож байна. 

Урьдчилсан хэлэлцүүлэгт оролцсон яллагдагчдын зарим өмгөөлөгч "иргэн гэм буруугаа тогтоолгохын тулд өмгөөлүүлэх эрхтэй" хэмээгээд шүүх хуралдааныг хойшлуулах хүсэлт гаргажээ.

Прокурор хэлэхдээ "Өмнө нь мөрдөн шалгах болон шүүхийн шатанд ч хангалтай хугацаа олгосон. Тиймээс шүүх хурлыг цааш үргэлжлүүлэх саналтай байна" гэсэн боловч өмгөөлөгчдийн гаргасан хүсэлтийг хэлэлцэхээр шүүх хуралдааныг түр завсарлажээ.