"Ханжоу 2022" Азийн наадмын байт харвааны ганцаарчилсан төрөлд Б.Отгонболд аваргын төлөөх өрсөлдөөнд БНХАУ-ын харваач Жи Шиан Шоу-г 6:2-оор ялж, Азийн наадмаас алтан медаль хүртсэн анхны харваач боллоо.
Алдар спорт хорооны тамирчин, ОУХМ Б.Отгонболд Азийн наадмын аварга болсныхоо дараа шууд ярилцлага өгөхдөө "Баярласан сэтгэлээ үгээр илэрхийлэхийн аргагүй байна. Бүх хүнд баярлалаа гэж хэлмээр байна" гэсэн юм.
Тэгвэл Азийн наадмын аварга Б.Отгонболд өөрийн цахим хуудаснаа "Дэмжсэн бүх хүмүүсдээ маш их, бүр маш их баярлалаа. Баярласандаа хэлэх ч үг үнэндээ олдохгүйнээ... Шантрахгүй зорилгынхоо төлөө тууштай байгаарай, шантрах үе гарсан ч энэ зүгээр л сорилт гэж бодоорой.
Тэнгэр чамайг харсан бол зовлонг өгч сорьдог. Дараа нь жаргалыг ухааралтай нь цуг жил жилээр нь өгч байдаг юм шүү..." хэмээн бичжээ.
Тив, дэлхий, олимпын медальт шилдгүүдийг ялж, Азийн наадмын алтан медаль хүртсэн Алдар спорт хорооны тамирчин, ОУХМ Б.Отгонболд энэ удаагийн тэмцээнээс “Парис 2024” олимпын наадмын эрхээ авсан билээ.