Зуны XIX дэх удаагийн Азийн наадам "Ханжоу 2022" 19 дахь өдрөө үргэлжилж байна.
Өнөөдөр Байт харвааны эрэгтэй ганаарчилсан рекурв төрөлд Баатархуягийн Отгонболд эзэн орны тамирчин Жи Шиан Шоу-г 6:2-оор буулган авснаар, Азийн наадмаас АЛТАН медаль хүртлээ.
Өдгөө 26 настай Б.Отгонболд финалын харваанд дэлхийн чансааны 23-т жагсаж буй, дэлхийн аваргын алт, мөнгөн медальтай Хятадын тамирчин Ши Шианшуог 2-6 харьцаагаар илүүрхэж Азийн наадмын аварга боллоо.
Нийт 43 орны харваачид оролцсон байт харвааны рекурв буюу 70 метрийн олимпын зайн төрөлд эрэгтэй 84 харваач оролцсоноос Б.Отгонболд урьдчилсан харваанд 662 оноогоор 20-р байраар эрэмбэлэгдэж финалд хүрэхийн тулд Пакистан, Япон, Тайвань, Индонез, Казахстаны тамирчдыг ялсан юм.
Б.Отгонболд олимпын мөнгө, хүрэл медальт Японы Т.Фурукаваг 6:5-аар, олимпын мөнгөн медальт Тайваны Тан Чиныг 6:2-оор, Дэлхийн цомын хүрэл медальт Индонезийн Р.Агатаг 6:0-оор ялж, хагас шигшээд шалгарсан юм.
Улмаар шийдвэрлэх харваанд олимп, дэлхийн хошой аварга БНСУ-ын У Жиныг хожоод байсан Казахстаны Илфат Абдуллиныг ялснаар Азийн наадмын мөнгөн медалын болзол хангаад байв.
Мөн Б.Отгонболд "Парис 2024" олимпын эрхээ энэхүү ялалтаараа аваад байсан юм. Энэ нь Монголын харваачдаас Парисыг зорих анхны эрх болов.
Дашрамд, түүний энэхүү амжилт Монголын Байт харвааны түүхэнд шинэ хуудас нээж, Азийн наадмаас анхны медаль, тэр тусмаа алтан медаль хүртсэн анхны тамирчин боллоо.
2011 оноос хойш олон улсын тэмцээнд оролцсон Б.Отгонболд нь "Токио 2020" олимпын ганцаарчилсан төрөлд 33-р байр, багийн төрөлд 27-р байр эзэлсэн туршлагатай тамирчин юм.