Монголын баг Ханжоугийн Азийн наадмаас анхны алтан медалиа авч, Монголын багийн ахлагч, Монголын спортын сэтгүүлчдийн холбоо наадмын Зохион байгуулах хороотой хамтран Олон улсын хэвлэлийнхэнд анхны Хэвлэлийн бага хурлыг зохион байгууллаа
Спортын сэтгүүлч Ж.Отгонцагаан хятад, англи, япон, солонгосоор орчуулга хийж, мэдээлэл өгч, Б.Чинзоригийн ялагчийн сэтгэгдлийг дэлхийн хэвлэлүүдэд түгээлээ.
МУГТ Б.Чинзориг "Азийн наадамд амжилт үзүүлж, олимпын эрх авах үүрэг, зорилготой ирсэн. Зорилгоо биелүүлсэндээ баяртай байна. Азийн наадамд гурав дахь удаагаа оролцлоо. Инчёны наадмын үеэр хөмсөг задарч, тэмцээнээ өндөрлүүлсэн. Жакартад мөнгөн медаль хүртсэн бол энэ наадмаас Монголын багийнхаа нэрийн өмнөөс анхны алтан медалийг эх орондоо зориулж авчирлаа. Сугалаа үнэхээр хатуу байлаа.
Жингийнхээ бүх хүчтэй өрсөлдөгчидтэй учраа таарч, тэднийг ялж, түрүүлсэндээ баяртай байна.
Тамирчдын тосгон, тэмцээний зохион байгуулалт гээд бүх зүйл үнэхээр гайхалтай байна. Ийм том наадмыг өндөр түвшинд зохион байгуулж байгаа Хятад улс, Ханжоу хотын ард иргэдэд баярлалаа" хэмээлээ.
