“Ханжоу 2022” зуны Азийн наадам эхлээд 12 дахь өдрөө үргэлжилж байна. Өнөөдөр боксын эрэгтэй -63.5 кг жинд МУГТ Баатарсүхийн Чинзориг аваргалж алтан медаль хүртлээ.

Финалд Тайванийн тамирчин Лай Чу Энийг шүүгчдийн саналаар ялснаар 19 дэх удаагийн Азийн наадмаас Монголын шигшээ багийн анхны алтан медалийг авчирлаа.

Энэ онд Ташкентад болсон дэлхийн аварга шалгаруулах тэмцээнээс мөнгөн медаль хүртсэн 32 настай Б.Чинзориг Туркменистан, Узбекистан, Казахстан, Тайландын боксчдыг ээлж дараалан ялсаар финалд хүрсэн юм.

Түүнтэй финалд өрсөлдсөн Тайванийн тамирчин Лай Чу Эн 27 настай бөгөөд 2016 оноос хойш олон улсын тэмцээнүүдэд оролцсон туршлагатай. Тэрээр финалд хүрэхийн тулд Балба, Лаос, Хятад, Иракийн боксчдыг ялсан юм.

Б.Чинзоригийн ялалт Монголын багийн амжилтыг дөрвөн байраар урагшлууллаа. 

Дашрамд, Монголын боксчдын хувьд Азийн наадмуудаас гурав дахь Алтан медалиа хүртлээ.