“Ханжоу 2022” зуны Азийн наадам эхлээд 11 хонож байна. Манай тамирчдаас тэмцээн эхэлснээс хойш “Парис-2024” олимпын наадмын гурван эрх өвөртлөөд байна.
О.Есүгэн дэлхийн хошой аваргыг ялж авсан олимпын эрх
Хамгийн эхний олимпийн эрхийг өвөртөлсөн тамирчин бол боксын эмэгтэйчүүдийн 50 кг-д хүч сорьсон О.Есүгэн. Манай тулаанч О.Есүгэн дэлхийн хошой аварга, Казахстаны Назым Кызайбайг ялж, Азийн наадмын хүрэл медалийн болзол хангаснаар "Парис 2024" олимпод оролцох эрхээ баталгаажуулсан. Ялсан нь медальд хүрэх тун хариуцлагатай даваанд манай боксчин шийдэмгий тулалдсаар өрсөлдөгчөө оноогоор ялсан. Шүүгчдийн дөрөв нь манай боксчинг ялсан гэсэн бол үлдсэн нэг нь тэнцсэн гэж үзсэн билээ. Тэрээр хагас шигшээ буюу медалийн өнгөө шийдэх тулаанд БНХАУ-ын Юү Вуд оноогоор ялагдсанаар хүрэл медаль хүртсэн билээ.
Б.Отгонболд түүх бичиж олимпын эрх өвөртлөв
"Ханжоу 2022" Азийн наадмын байт харвааны ганцаарчилсан төрөлд Б.Отгонболд хагас шигшээд Казахстаны харваач Илфат Абдуллиныг 6:2-оор буулган авч, Азийн наадмын мөнгөн медалийн болзол биелүүлээд зогсохгүй “Парис 2024” олимпын эрхээ авсан. Тэрээр аваргын төлөө эзэн орны харваач Жи Шиан Шоутай аравдугаар сарын 7-нд 11.30 цагаас харвах юм. Монгол Улс өмнө нь Азийн наадмаас байт харвааны төрлөөр медальд хүрч үзээгүй бөгөөд анхны медалийг Б.Отгонболд авчирч, шинэ түүх бичлээ.
Токиогийн олимпод эх орноо төлөөлөн оролцож байсан, олон улсын хэмжээний мастер Б.Отгонболд өмнөх Азийн наадамд эрэгтэй баг, холимог багийн төрөлд өрсөлдөн IV байр эзлэн, медалийн оосроос атгаад алдсан амжилтаа ийнхүү ахиулж Азийн наадмын медальт анхны Монгол харваач боллоо.
Гурав дахь олимпын эрхийн эзэн Б.Чинзориг
Азийн наадмын анхны хос медальт боксчин болсон, ДАШТ-ий мөнгөн медальт, "Алдар" спорт хорооны тамирчин, олон улсын хэмжээний мастер Б.Чинзориг Азийн наадмын 63.5 кг-д олимпын эрх өвөртөлсөн. Тэрээр медалийн төлөөх тулаанаа Казахстаны боксчин Ертуган Жэйнуллиновтой хийж, оноогоор ялснаар хүрэл медалийн болзлоо хангасан. Харин өчигдөр медалийн өнгөө хувиргах эсэх болон "Парис 2024" олимпын эрхээ авах хариуцлагатай даваанд өнгөрсөн оны тивийн аварга Тайландын Бунжонг Синсиритэй тулалдаж, ялалт байгуулж олимпын эрхээ аваад байна.
Ийнхүү одоогоор манай гурван тамирчин "Парис-2024" олимпод оролцох эрхээ өвөртлөөд байна.
Б.Чинзориг өнөөдөр 20:00 цагаас АЛТАН МЕДАЛИЙН ТӨЛӨӨ тулалдана.
