Монголбанкны ерөнхийлөгчийн санаачилгаар 2018 оноос эхлэн жил бүр уламжлал болгон зохион байгуулдаг банк хоорондын Байт харвааны аварга шалгаруулах тэмцээн энэ оны наймдугаар сарын 27-ны өдөр Үндэсний цэцэрлэгт хүрээлэнд байрлах “Байт харвааны 360 төв” талбайд зургаа дахь жилдээ амжилттай болж өндөрлөлөө.

Монголын банкны салбарт нийт 16,000 гаруй залуучууд ажилладаг бөгөөд тэдний дунд олимпын спортын төрөл болох Байт харвааны нөхөрсөг тэмцээнийг зохион байгуулснаар төвлөрөл, тэсвэр тэвчээр, онч мэргэнийг сорих, ажилтнуудаа биеийн тамир спортоор хичээллүүлэх, банкны ажилтнуудын хоорондын харилцааг бэхжүүлэх, мөн Байт харвааны спортыг сурталчлан таниулах, хөгжүүлэх зэрэг олон давуу талтай юм.

Тус тэмцээний энэ жилийн ерөнхий зохион байгуулагчаар тэмцээний 2022 оны аварга Голомт банк, хамтран зохион байгуулагчаар Монголбанк, мөн 10 жилийн ой нь тохиож буй Хадгаламжийн даатгалын корпорац хамтран ажиллажээ.

Тэмцээнд банк, санхүүгийн салбарын нийт 12 байгууллагын 120 гаруй баг тамирчид, эрэгтэй эмэгтэй ганцаарчилсан, холимог, эрэгтэй эмэгтэй багийн гэсэн гурван төрөлд цэц мэргэнээ сорин өрсөлдсөн юм. Тэмцээний нэгдсэн дүнгээр Хас банкны баг тамирчид 1-р байр, Хаан банкны баг тамирчид 2-р байр, Голомт банкны баг тамирчид 3-р байрыг тус тус эзэллээ.

Тэмцээнд идэвхтэй оролцсон нийт банкир тамирчдадаа баяр хүргэе!