Монгол улсын анхны Дэлхийн аварга, Гавъяат тамирчин Д.Дэмбэрэл, Гавъяат дасгалжуулагч Л.Жамъянсүрэнгийн нэрэмжит 19 дэх удаагийн Байт харвааны "Гавъяатуудын нэрэмжит тэмцээн-2023" Төв аймгийн Зуун мод хотноо өнгөрсөн амралтын өдрүүдэд боллоо.
Олон улсын стандартын дагуу зохион байгуулдаг энэхүү тэмцээнийг 1994 оноос хойш тасралтгүй зохион байгуулж байгаа бөгөөд цар тахлын жил буюу 2021 онд өнжөөд байсан юм. Тэгвэл Төв аймгийн 100 жилийн ойн хүрээнд Монголын Байт харвааны холбоо Төв аймгийн БТСГ-тай хамтран зохион амжилттай зохион байгууллаа. Мөн Дэмжигч байгууллагаар Төрийн банк ажилласан байна.
Монгол улсын анхны Дэлхийн аварга, МУГТ Д.Дэмбэрэл нь Баян-Өнжүүл сумын уугуул бол Гавъяат дасгалжуулагч Л.Жамъянсүрэн нь Баянцагаан сумын уугуул юм.
Энэхүү тэмцээнд 10 байгууллагын 80 гаруй тамирчин оролцож, рекурв болон компаунд төрлөөр 9 багц медалийн төлөө цэц мэргэнээ сорьж, аваргуудаа тодруулав.
Шагнал гардуулах ёслолын ажиллагаанд Монголын Байт харвааны холбооны Ерөнхийлөгч С.Эрдэнэболд, УИХ-ын гишүүн Ц.Туваан, Төв аймгийн Засаг даргын тамгын газрын дарга М.Отгонбат, Зуун мод сумын Засаг дарга Д.Сарангэрэл, "Бээжин-2008" паралимпын аварга, Хөдөлмөрийн баатар, Гавъяат тамирчин Д.Баатаржав, Төв аймгийн БТСГ-ын дарга Д.Алтанхуяг, Монгол Улсын гавъяат дасгалжуулагч Л.Жамъянсүрэнийн гэр бүлийг төлөөлж, түүний охин Байт харвааны ОУХМ Ж.Удвал нар оролцлоо.
Энэ үеэр ОУХМ Ж.Удвал "Миний аав Лувсандугарын Жамъянсүрэн, Должингийн Дэмбэрэл агсны нэрэмжит тэмцээн 19 дэх удаагаа зохион байгуулагдлаа. Спортын түүхэнд 19 удаа тасралтгүй тэмцээн зохион байгуулах гэдэг урт хугацаа. Энэ тэмцээнийг зохион байгуулдаг тухайн жил бүр аймгийн Засаг дарга, Биеийн тамир спортын газар, нутгийн иргэд сэтгэл гарган дэмждэг юм. Иймээс ч уламжлал болж, урт хугацаанд зохион байгуулагдаж байна. Энэ жил гадаад улсаас тамирчид ирж оролцож чадсангүй. Дараа жил буюу 2024 онд тэгш ойн тэмцээн нь болно. Ирэх жилийн тэмцээнд олон улсын баг тамирчдыг урих болно.
Манай гэр бүлийн зүгээс тэмцээндээ амжилттай оролцсон баг тамирчид, дасгалжуулагч багш нартаа, зохион байгуулсан, дэмжсэн бүх хүмүүстээ талархаж байгаагаа илэрхийлж байна. Байт харваа монголын, дэлхийн түүхэнд дахин Дэлхийн аварга, Олимпын аваргыг төрүүлэх болтугай хэмээн хүсье! Баярлалаа" хэмээлээ.
"Гавъяатуудын нэрэмжит тэмцээн-2023"-д байгууллагын дүнгээр Монгол Улсын Үндэсний шигшээ баг түрүүлсэн бол Зэвт хасар клуб мөнгө, Алдар спорт хороо хүрэл медаль хүртлээ.
Тэмцээний дүнг танилцуулж байна.
Рекурв төрлийн эрэгтэй ганцаарчилсан харваанд
- ОУХМ Д.Дашнамжил алтан медаль /Үндэсний шигшээ баг/
- ОУХМ Ө.Нэхийт мөнгөн медаль /Алдар спорт хороо/
- ОУХМ Б.Отгонболд хүрэл медаль /Үндэсний шигшээ баг/
Рекурв төрлийн эмэгтэй ганцаарчилсан харваанд
- ОУХМ Н.Ариунбилэг алтан медаль /Үндэсний шигшээ баг/
- ОУХМ Б.Урантунгалаг мөнгөн медаль /Үндэсний шигшээ баг/
- ОУХМ А.Энхтуяа хүрэл медаль /Үндэсний шигшээ баг/
Компаунд төрлийн эрэгтэй хувийн харваанд
- Спортын мастер П.Жамъянгомбо алтан медаль /Зэвт хасар клуб/
- ОУХМ Г.Ган-Эрдэнэ мөнгөн медаль /Зэвт хасар клуб/
- Спортын мастер Л.Мөнхбаатар хүрэл медаль /Алдар спорт хороо/
Компаунд төрлийн эмэгтэй хувийн харваанд
- Спортын дэд мастер О.Биндэръяа алтан медаль /Зэвт хасар клуб/
- Спортын мастер Б.Батдулам мөнгөн медаль /Зэвт хасар клуб/
- Д.Отгонбаяр хүрэл медаль /Зэвт хасар клуб/
Рекурв төрлийн холимог багийн харваанд
- Алдар спорт хороо - Алт
- Үндэсний шигшээ баг - Мөнгө
- Хангарди клуб - Хүрэл
Компаунд төрлийн холимог багийн харваанд
- Алдар спорт хороо - Алт
- Зэвт хасар клуб - Мөнгө
- Компаунд зөвлөл - Хүрэл
Рекурв төрлийн эрэгтэй багийн харваанд
- Алдар спорт хороо - Алт
- Үндэсний шигшээ баг - Мөнгө
- Хангарди клуб - Хүрэл
Рекурв төрлийн эмэгтэй багийн харваанд
- Үндэсний шигшээ баг - Алт
- Үндэсний Пара шигшээ баг - Мөнгө
- Хангарди клуб - Хүрэл
Байгууллагын дүн
- Монгол Улсын Үндэсний шигшээ баг - Алт
- Зэвт хасар клуб - Мөнгө
- Алдар спорт хороо - Хүрэл
