Байт харвааны спортын 2023 оны Улсын аварга шалгаруулах тэмцээн наймдугаар сарын 10-наас 13-ны хооронд Улаанбаатар хотноо боллоо. Тэмцээнийг Монголын байт харвааны холбоо Төрийн банктай хамтран амжилттай зохион байгуулав.
Насанд хүрэгчдийн улсын аварга шалгаруулах тэмцээнд 14 байгууллагын 115 тамирчин оролцож, рекурв болон компаунд төрлөөр 10 багц медалийн төлөө цэц мэргэнээ сорьж, аваргуудаа тодруулав. Тамирчдын онооны чансаа өндөр, өрсөлдөөн ихтэй, цолны болзол үнэмлэхүй хангасан, залуу аваргууд төрөн гарч, шинэ түүх бүтээсэн тэмцээн боллоо.
Энэ удаагийн тэмцээн Олон улсын стандартын дагуу урьдчилсан харваагаа дөрвөн зайнд явуулсан бөгөөд эрэгтэй тамирчид 90, 70, 50, 30 метрийн зайнд, эмэгтэй тамирчид 70, 60, 50, 30 метрийн зайнд харвасан юм.
Монголын байт харвааны холбоо М1 буюу дөрвөн зайн тэмцээнийг хоёр жилд нэг удаа зохион байгуулдаг бөгөөд нийт 28 тамирчин цолоо ахиулж, шинээр цолны болзол хангасан байна. Үүнд дөрвөн Олон улсын хэмжээний мастер, таван Спортын мастер, 19 Спортын дэд мастер төрөн гарчээ.
Байгууллагын дүнгээр Алдар спорт хороо 51 оноогоор аваргалсан бол Хангарди клуб 47 оноогоор мөнгөн медаль, Зэвт хасар клуб 44 оноогоор хүрэл медаль хүртлээ.
Мөн рекурв төрлийн эмэгтэй хувийн харваанд 16 настай, энэ тэмцээнд спортын дэд мастер цолны болзол биелүүлсэн Алдар спорт хорооны тамирчин А.Мишээл алтан медаль хүртэж, улсын аварга боллоо.
Харин эрэгтэй хувийн харваанд Олон улсын хэмжээний мастер цолны болзол биелүүлсэн Алдар спорт хорооны тамирчин Ө.Нэхийт алтан медаль хүртсэн байна. Ө.Нэхийтийн хувьд насанд хүрэгчдийн Улсын аварга шалгаруулах тэмцээнээс гурав дахь түрүүгээ ийн авч байна. Тэрээр мөн 2023 оны Заалны улсын аварга шалгаруулах тэмцээнд аваргын алтан медалийг хүртэж байсан юм.
Компаунд төрлийн эрэгтэй хувийн харваанд Зэвт хасар клубын тамирчин Спортын мастер цолны болзол биелүүлсэн 14 настай М.Тэлмүүн аваргын алтан медалийг хүртлээ.
Эмэгтэй хувийн харваанд Зэвт хасар клубын тамирчин, Спортын мастер Б.Батдулам түрүүлэв. Б.Батдуламын хувьд Улсын аварга шалгаруулах тэмцээнээс гурав дахь түрүүгээ аваад байна.
Тэмцээний дүнг танилцуулж байна.
Байгууллагын дүн
- Алдар спорт хороо - Алт
- Хангарди клуб - Мөнгө
- Зэвт хасар клуб - Хүрэл
Рекурв төрлийн эрэгтэй ганцаарчилсан харваанд
- ОУХМ Ө.Нэхийт алтан медаль /Алдар спорт хороо/
- ОУХМ Б.Буянтүшиг мөнгөн медаль /Алдар спорт хороо/
- ОУХМ Б.Нармандах хүрэл медаль /Нийслэл өргөө клуб/
Рекурв төрлийн эмэгтэй ганцаарчилсан харваанд
- Спортын дэд мастер А.Мишээл алтан медаль /Алдар спорт хороо/
- Спортын дэд мастер Б.Билгүүнзаяа мөнгөн медаль /Хангарди клуб/
- ОУХМ Б.Урантунгалаг хүрэл медаль /Алдар спорт хороо/
Компаунд төрлийн эрэгтэй хувийн харваанд
- Спортын мастер М.Тэлмүүн алтан медаль /Зэвт хасар клуб/
- Спортын мастер П.Жамъянгомбо мөнгөн медаль /Зэвт хасар клуб/
- ОУХМ Г.Ган-Эрдэнэ хүрэл медаль /Зэвт хасар клуб/
Компаунд төрлийн эмэгтэй хувийн харваанд
- Спортын мастер Б.Батдулам алтан медаль /Зэвт хасар клуб/
- Спортын дэд мастер Ж.Есөн-Эрдэнэ мөнгөн медаль /Зэвт хасар клуб/
- Спортын дэд мастер О.Биндэръяа хүрэл медаль /Зэвт хасар клуб/
Рекурв төрлийн холимог багийн харваанд
- Галтсум клуб - Алт
- Хангарди клуб - Мөнгө
- Алдар спорт хороо - Хүрэл
Компаунд төрлийн холимог багийн харваанд
- Зэвт хасар клуб - Алт
- Алдар спорт хороо - Мөнгө
- Добу мэргэн клуб - Хүрэл
Рекурв төрлийн эрэгтэй багийн харваанд
- Хангарди клуб - Алт
- Алдар спорт хороо - Мөнгө
- Нийслэл өргөө клуб - Хүрэл
Рекурв төрлийн эмэгтэй багийн харваанд
- Хангарди клуб - Алт
- Алдар спорт хороо - Мөнгө
- Добу мэргэн клуб - Хүрэл
Компаунд төрлийн эрэгтэй багийн харваанд
- Зэвт хасар клуб - Алт
- Компаунпд зөвлөлийн баг - Мөнгө
- Алдар спорт хороо - Хүрэл
Дашрамд, Монголын байт харвааны холбоо А, B, C зэрэглэлийн тэмцээнүүдийг Олимпын зай буюу 70*2-т нийт 72 сум харвуулж зохион байгуулдаг байна.
Цол зэргийн болзол хангаж, амжилтаа ахиулсан нийт баг, тамирчдад халуун баяр хүргэе!
