Байт харваан спортын гадаа талбайн 2023 оны эхний тэмцээн амжилттай болж өндөрлөлөө.
Байт харваан холбооноос зохион байгуулсан “Улирлын нээлт” тэмцээн амралтын өдрүүдэд Үндэсний цэцэрлэгт хүрээлэнд байрлах "Дайчин Чанар-Тэсвэрийн талбар 360" талбайд болсон бөгөөд цаг агаарын нөхцөл хүнд, салхи шуургатай, цас бороотой байсан ч тамирчдын онооны чансаа өндөр, өрсөлдөөн ихтэй болж өнгөрлөө.
Нийт 11 байгууллагын 80 гаруй тамирчид “Рекурв”, “Компаунд” төрлөөр хувь буюу ганцаарчилсан, холимог баг /эрэгтэй, эмэгтэй/, багийн /эрэгтэй гурван тамирчин, эмэгтэй гурван тамирчин/ 10 багц медалийн төлөө цэц мэргэнээ сорьсон юм.
Байгууллагын дүнгээр "Хангарди" клуб нэгдүгээр байр, "Алдар" спорт хороо хоёрдугаар байр, "Зэвт хасар" клуб гуравдугаар байр эзэлсэн байна.
Харин эрэгтэй ганцаарчилсан төрөлд "Алдар" спорт хорооны тамирчин ОУХМ Б.Отгонболд /Рекурв/ тэргүүлсэн бол эмэгтэй ганцаарчилсан төрөлд "Добу мэргэн" клубын тамирчин ОУХМ Б.Оюун-Эрдэнэ /Рекурв/ алтан медаль хүртэв.
Мөн Компаунд төрлөөр эрэгтэй ганцаарчилсанд "Добу мэргэн" клубын тамирчин Спортын мастер Г.Шандан, эмэгтэй ганцаарчилсанд "Зэвт хасар" клубын тамирчин О.Биндэръяа тус тус алтан медаль хүртсэн байна.
Дашрамд, Байт харваан спортын хувьд үндсэн тэмцээн эхлэхийн өмнөх өдөр тэмцээний талбай, зайд тамирчид өөрийн нум сумны техникийн байдлыг хангуулах, бэлдэх үүднээс "хараа тааруулах" харваагаар тэмцээнээ эхлүүлдэг байна.
