Байт харваан спортоор анхлан хичээллэж буй тамирчдын дунд зохион байгуулагдаж буй "Debut Archery Cup 2023" анхдугаар тэмцээн өнөөдөр эхэлнэ.

Байт харваан Заалны Улсын аварга шалгаруулах 15 дахь удаагийн тэмцээн өнгөрсөн гуравдугаар сарын 22-26-ны өдрүүдэд Эрдэнэт хотноо олон улсын түвшинд амжилттай зохион байгуулагдсан билээ. Тус тэмцээнд 300 гаруй тамирчид оролцож, цэц мэргэнээ сорьсон нь түүхэнд бичигдэх олон оролцогчтой харвааны тэмцээн байв. 

Энэ удаагийн заалны улсын аварга шалгаруулах тэмцээнд дэд мастер цолны болзол хангасан 11 тамирчин шинээр төрсөн ба энэ нь тамирчдын чансаа өдрөөс өдөрт нэмэгдэж, өрсөлдөх чадвар сайжирч байгааг харуулж буй. 

Тэгвэл Байт харваан Debut Archery нэгдлээс Монголын Байт харваан холбоотой хамтран тус спортоор анхлан /2019 оноос хойш/ хичээллэж буй тамирчин, сонирхогчдыг сэдэлжүүлэх, тэмцээний туршлага суулгах, тогтмол амжилттай байх боломж олгох зорилгоор цолгүй тамирчдын дунд "Debut Archery Cup 2023" анхдугаар тэмцээнийг зохион байгуулж байна. 

Тэмцээн хоёр өдөр үргэлжлэх ба орон нутгийн тамирчид өөрсдийн байгаа бүсээс оролцох боломжтойгоороо онцлог аж. 

Тус тэмцээн олон улсын дүрмийн дагуу зохион байгуулагдах бөгөөд өсвөр үе, залуучууд, насанд хүрэгчид ангиллаар, "Рекувр" болон "Компаунд" төрлүүдээр явагдана.

Зохион байгуулагчдын зүгээс "Debut Archery Cup 2023 тэмцээн нь байт харвааг сонирхон хичээллэж буй тамирчдад урам зориг өгөх, цаашдын амжилт гаргах суурь нь болоосой гэж найдаж байгаа. Мөн энэ тэмцээний зохион байгуулалтын философи нь байт харваагаар хичээллэгч тамирчин та өөрийгөө ялан дийлж, хүссэн амжилтаа гаргана гэдэгт итгэж байгаад оршино. Шудрага өрсөлдөөрэй. Амжилт хүсье" хэмээн бичжээ.

"Debut Archery Cup 2023" анхдугаар тэмцээн дөрөвдүгээр сарын 15, 16-нд Баянзүрх дүүрэгт байрлах "G" спорт зааланд болно. 

Энэхүү тэмцээн нь Байт харваан спортыг сонирхогч хэн бүхэнд нээлттэй ба сонирхогч та бүхнийг урьж байна. 

Дашрамд, тамирчдын урьдчилсан харвааны оноо тогтмол нэмэгдэж, чадвар дээшилж буйтай уялдуулан Байт харваан холбоо цол зэрэг хангах оноог 2019 онд нэмэгдүүлсэн байдаг. Тухайлбал, дэд мастерын болзол биелүүлэх оноо 520 байсныг 540, спортын мастер 540 байсныг 560 болгож өөрчилсөн юм. Тамирчид заалны тэмцээнд нийт 60 сум харвах ба нийлбэр дээд оноо 600 байдаг. Тус спорт нь урьдчилсан харвааны нийлбэр оноогоор цол, зэргийн болзол хангадаг тул тамирчин бусадтай өрсөлдөх бус өөртэйгөө илүү ажилладаг гэхэд болно. Цолны оноог нэмэгдүүлснээр тамирчдын чансаа өндөрсөж, олон улсад ч торохгүй харвах үүд нээгдэж буй.