“Улаанбаатар кап” 3x3 сагсан бөмбөгийн тэмцээн энэ сарын 22-нд эхэлнэ

Тодруулбал, нийтийн биеийн тамирыг хөгжүүлэх, хүүхэд залууст спортоор хичээллэх, чөлөөт цагаа зөв боловсон өнгөрүүлэх боломжийг бүрдүүлэхэд нийслэлийн зүгээс онцгой анхаарч буй. Энэ хүрээнд НЗДТГ, Монголын 3x3 сагсан бөмбөгийн холбоо хамтран “Улаанбаатар кап” 3x3 сагсан бөмбөгийн тэмцээнийг энэ сарын 22-ноос зохион байгуулах гэж байна.

Энэ талаар Монголын сагсан бөмбөгийн холбооны Ерөнхий нарийн бичгийн дарга С.Төгсжаргал мэдээлэл өглөө. 

Тэрээр "Монголын Сагсан Бөмбөгийн Холбоо, 3х3 Сагсан Бөмбөгийн Холбоо, Нийслэлийн Засаг Даргын Тамгын Газар хоорондоо харилцан ойлголцлын Санамж бичиг байгуулсан. Энэ хүрээнд "Улаанбаатар кап 2023" 3х3 сагсан бөмбөгийн тэмцээн болно. 

Тэмцээн дөрөвдүгээр сарын 22-ноос эхэлж, амралтын өдрүүдээр есөн дүүргийн аварга шалгаруулах тэмцээн зохион байгуулагдаж, тавдугаар сарын 21-нд аваргын төлөөх тоглолтууд болох юм.

Аварга баг нь ирэх долдугаар сард болох Олон Улсын Сагсан Бөмбөгийн Холбооны их дуулгад оролцох эрхээ авна. Тиймээс хүүхэд залуучууд та бүхнийг тус тэмцээнд оролцохыг урьж байна" гэлээ.

"Улаанбаатар кап" нь эрэгтэй, эмэгтэй насан хүрэгчдийн ангиллаар зохион байгуулагдах ба 17-18 настнууд ч оролцох боломжтой зохион байгуулагчид онцлов.