Хангарди спорт клубын тамирчин, Спортын мастер Машбаярын Гэгээн

Байт харваан спортын XV дахь удаагийн Заалны Улсын Аварга шалгаруулах тэмцээн гуравдугаар сарын 23-26-ны хооронд Эрдэнэт хотод болно.

Байт харвааны Заалны Улсын аварга шалгаруулах тэмцээн энэ жил Рекувр болон Компаунд төрлүүдээр U14, U18, U21, насанд хүрэгчид гэсэн дөрвөн ангилалд болох юм.

Тамирчид “Рекувр” төрөлд ангилал тус бүрт эрэгтэй, эмэгтэй хувийн харваа, багийн харваа, холимог багийн харваагаар өрсөлдөх бол “Компаунд” төрөлд эрэгтэй, эмэгтэй хувийн харваа, эрэгтэй багийн харваа төрлөөр 19 багц медалийн төлөө цэц мэргэнээ сорино.

Өнөөдрийн байдлаар монгол улсын хэмжээнд үйл ажиллагаагаа явуулдаг 24 байгууллагын 330 гаруй тамирчин бүртгүүлжээ.

Тус тэмцээнийг Орхон аймгийн Засаг даргын Тамгын газар, ИТХ, Монголын Байт Харвааны холбоо, Эрдэнэт үйлдвэр ТӨҮГ-ын Хангарди спорт цогцолбор, Орхон аймгийн Биеийн тамир спортын газар хамтран зохион байгуулж байгаа аж.

Тэмцээний техникийн зөвлөгөөн гуравдугаар сарын 22-ны лхагва гаригт 17:00 цагт Орхон аймагт болно. Түүнчлэн, Монголын Байт Харваан Холбооны удирдах зөвлөлийн хурал Эрдэнэт хотод болох юм байна. 

Мөн энэ жилийн хувьд өмнөх жилүүдээс харьцангуй олон тамирчин оролцохоор бүртгүүлсэн тул холбооны зүгээс тэмцээний үеэр тамирчиддаа чиглэсэн сургалтыг явуулахаар төлөвлөсөн байна. 

Дашрамд, 2022 оны ЗУАШТ-д байгууллагын дүнгээр Хангарди клуб алтан медаль, Алдар спорт хороо мөнгөн медаль, Орхон аймгийн баг тамирчид хүрэл медаль хүртэж байв. Харин хувийн шигшээ харвааны төрөлд Алдар спорт хорооны тамирчин, "Токио-2020" олимпын наадмын оролцогч, ОУХМ Б.Отгонболд, Хангарди клубын тамирчин, ОУХМ А.Энхтуяа нар алтан медаль тус тус хүртэж байжээ.

Тэмцээний хөтөлбөрийг та бүхэндээ танилцуулж байна.