ХӨСҮТ-ийн Ерөнхий захирал Ц.Билэгтсайхан дараах мэдээллийг өглөө. 

Тэрээр "Томуугийн өвчлөл Говь-Алтай, Дархан-Уул аймагт улирал хооронд буюу ногоон түвшинд байгаа бол 11 аймагт идэвхжлийн буюу шар түвшинд, найман аймагт алаг цоог дэгдэлтийн түвшинд байна.

Томуу, томуу төст өвчнөөр өвчлөгсдийн 80 хувь нь 15 хүртэлх насны хүүхдүүд бөгөөд тэдгээрийн тал хувийг дөрөв хүртэлх насныхан дангаараа эзэлж байна.

Мөн амьсгалын замын цочмог хүнд халдварын оноштой эмнэлэгт хэвтэж буй иргэдийн 85.7 хувь нь 15 хүртэлх насныхан, тэр дундаа 75 хувь нь дөрөв хүртэлх насныхан байгаа юм.

Одоогоор улсын хэмжээнд томуугийн эсрэг вакцинжуулалт 65 хувьтай үргэлжилж байна. Бид 214,000 хүүхдэд вакцин хийнэ гэж төлөвлөснөөс 90.7 хувь нь хамрагдсан. Мөн жирэмсэн эхчүүдийн 15.3 хувь, 65-аас дээш насны иргэдийн 53 хувь нь томуугийн вакцин хийлгэсэн гэх тоон мэдээлэл байна.

Аймгуудаас улирлын томуугийн вакцинжуулалтыг Дархан-Уул аймагт 95 хувь, Баянхонгор аймагт 94 хувь, Орхон аймагт 90 хувьтай буюу сайн зохион байгуулж байгаа бол Завхан болон Говьсүмбэр аймагт вакцинжуулалтыг эрчимжүүлэх шаардлага бий" гэлээ.

Мөн тэрээр "Манай улсад ковидын халдварын Омикроны дэд хувилбар бүртгэгдэж, тархалт нь нэмэгдэж байна. Түүнчлэн томуу төст өвчнийг үүсгэгч хэд хэдэн халдвараас гадна томуугийн В хүрээний вирус шинээр тодорхойлогдсон" гэв.