Буудлага спортын Дэлхийн аварга шалгаруулах тэмцээн энэ сарын 12-28-нд Египетийн Кайр хотод болж байна.

Монголын буудлагын тамирчид ДАШТ-д өндөр амжилт гаргаж, алт, мөнгө, хүрэл медалийн эзэн боллоо. Тодруулбал, эмэгтэйчүүдийн том калибрын гар бууны 25 метрийн дасгалд есөн тамирчин онч сорьсноос Ц.Мөнхзул 585 оноогоор (293+292) алт, Т.Баярцэцэг 564 оноогоор (277+287) мөнгөн медалийн эзэн боллоо. Тэрээр эхний шатанд зургаад жагсаж байсан ч түргэн буудлагаа сайн буудсанаар дэд байр руу дэвшжээ.

Түүнчлэн Э.Хишигдэлгэр 557 оноогоор (286+271) хүрэл медаль хүртсэнээр Монголын гурван тамирчин уг дасгалын бүх медалийг авлаа.

Ийн Монголын тамирчид энэ жилийн ДАШТ-ээс нэг алт, хоёр мөнгө, нэг хүрэл медаль хүртэж түүхэн амжилтыг бүтээлээ.

Сонирхуулахад, Дөрвөн жил тутамд болдог энэхүү тэмцээнээс Монгол Улсын баг өмнө нь нэг алт, нэг мөнгө, хоёр хүрэл медаль хүртсэн байдаг. Тухайлбал, 1998 онд Д.Мөнхбаяр алт, 2006 онд О.Гүндэгмаа хүрэл, 1998 онд Д.Мөнхбаяр, О.Гүндэгмаа, Д.Оюун нар багийн төрөлд хүрэл, 2014 онд О.Гүндэгмаа, Ц.Мөнхзул, Т.Баярцэцэг нар мөнгөн медаль хүртэж байжээ.

Дашрамд, тус тэмцээний сонгомол гар бууны 50 метрийн дасгалын холимог багийн төрөлд Монгол Улсын тамирчин ОУХМ Э.Даваахүү, ОУХМ Ц.Мөнхзул нар мөнгөн медаль хүртээд байна.