Энэ оны хоёрдугаар сард (2022.02.23) Засгийн газрын олимп, паралимпын наадам, дэлхийн аварга шалгаруулах тэмцээнээс медаль хүртсэн тамирчдади олгодог мөнгөн урамшууллыг нэг тэрбум 848 сая төгрөгөөр тогтоожээ. 2022 онд олгох сар бүрийн мөнгөн урамшуулалд шаардагдах нэг тэрбум 848 сая төгрөгийг Биеийн тамир, спортын хорооны батлагдсан төсвөөс гаргахаар шийдвэрлэж, тус хорооны даргад даалгасан.

Энэ мөнгийг ирэх онд 2,2 тэрбум төгрөг болгон нэмэгдүүлсэн байна. Энэ тухай Байнгын хорооны гишүүдийн асуултанд Олимп, нийтийн биеийн тамир, спортын сайд Б.Бат-Эрдэнэ дараах хариултыг өгчээ.

Г.Дамдинням: 

-Олимпын наадмаас медаль хүртсэн тамирчдад насан туршид нь цалин өгдөг байдлыг болъё. Жил бүр 1.8 тэрбум орчим төгрөг зарцуулагдаж байгаа. Ямар нэг ажил хийдэг болгох талаас нь Засгийн газраар журмыг нь өөрчлүүлэх ёстой гэсэн тогтоолыг байнгын хорооноос гаргасан. Уг тогтоолын хэрэгжилт ямар байгаа вэ? Хэр их мөнгө зарцуулагдах вэ?

Б.Бат-Эрдэнэ:

-Олимп болон дэлхийн аварга шалгаруулах тэмцээнээс медаль авсан тамирчдын урамшуулалд 2.2 тэрбум төгрөг төсөвлөж, нэмэгдсэн. Дэлхийд манай улс шиг сар бүр тамирчдадаа цалин урамшуулал олгодог улс бий. Зарим нь нэг удаа шагнал өгдөг улс ч байгаа. ОХУ тэргүүтэй зарим улс нэг олимпоос нөгөө олимп хүртэл энэхүү урамшууллыг олгоод, тэтгэвэрт гарахаар нь үргэлжлүүлж олгодог зарчимтай.

Манай улсын хувьд спорт асар их уналтад орсон. Нэг үгээр хэлбэл төрийн ивээлийн гадна талд орхисон. 2000 оноос хойш биеийн тамир спортыг төрийн мэдэлд авч, хуультай болгосноор 2008 онд монголчууд олимпын наадмаас гурван медаль хүртсэн.

Олимп хаяанд тулсан энэ үед тамирчдад урам зориг өгөх үүднээс сар болгоны урамшууллыг өмнөх шиг нь олгох нь зүйтэй гэдэг байр суурьтай байна. 2024 оны Парисын олимпын дараа энэ асуудлыг дахин ярьж болно.