Узбекистаны нийслэл Ташкент хотноо жүдо бөхийн ДАШТ үргэлжилж байна. 

Өнгөрсөн хагас сайн өдөр МУГТ Ц.Цогтбаатар эрэгтэйчүүдийн -73кг жинд алтан медаль хүртэж Монгол Улсын жүдо бөхийн тав дахь дэлхийн аварга болсон билээ. 

Тэгвэл манай жүдоч өөрийн улсын төрийн дууллыг дэлхийн жүдо бөх сонирхогч нартаа заахаар болжээ. 

Ихэнх жүдо бөх сонирхогчид Японы төрийн дууллыг цээжээрээ мэддэг. Хамгийн энгийн жишээ гэхэд энэ удаагийн ДАШТ-ий эхний дөрвөн өдрийн байдлаар Японы таван тамирчин алтан медаль хүртэж, Ташкентын тэнгэрт төрийн дууллаа эшиглүүлсэн. Харин тэмцээний гурав дахь өдөр МУГТ Ц.Цогтбаатар эрэгтэйчүүдийн -73кг жинд алтан медаль хүртсэнээр Ташкентад Японы төрийн дуулал дөрөв дараалж тоглогдсон цувралыг зогсоосон юм. 

Олон улсын жүдо бөхийн холбоо (IJF) шинэхэн дэлхийн аварга Ц.Цогтбаатарыг өндөр зорилготой, тэрнийхээ хэрээр сайн бэлтгэл хангаж байгааг онцолжээ. Мөн Монголын жүдо бөхийн шинэ үеийн хамгийн том төлөөлөгч Ц.Цогтбаатарыг цаашид илүү өсөж, хөгжих потенциалтай бөх хэмээсэн юм.

Мөн түүнийг жүдо сонирхогчдод Монгол Улсын төрийн дууллыг цээжилтэл олон тэмцээнд түрүүлэх боломжтой гэж тодорхойлжээ.