Узбекистан улсын Ташкент хотод жүдо бөхийн Дэлхийн аварга шалгаруулах тэмцээн эхэллээ. Аравдугаар сарын 6-13-ны хооронд үргэлжлэх тэмцээнд 82 улсын 571 тамирчин оролцож байна.

Тус тэмцээний эхний өдөр манай улсаас дөрвөн бөх барилдсанаас эрэгтэйчүүдийн 60 кг-ын жинд зодоглосон олон улсын хэмжээний мастер Энхтайваны Ариунболд мөнгөн медалийн эзэн боллоо.

Тэрээр ДАШТ-д анх удаа зодоглож буй юм. 

ОУХМ Э.Ариунболд эхний барилдаанд Чехийн Д.Пулкрабекийг цэвэр, шөвгийн 16-д гүрж гаралтай нидерланд жүдоч Т.Цакадоеваг вазаригаар, шөвгийн наймд Италийн А.Пантаног нэмэлт цагт вазаригаар, хагас шигшээд эзэн орны бөх Д.Баратовыг тус тус буулгаж авсаар финалд шалгарсан.

Харин аваргын төлөөх барилдаанд олимпын аварга, дэлхийн аваргын дөрвөн алтан медальт Японы Н.Такатод цэвэр ялагдсан юм. Ингэснээр тэрээр эхний оролдлогоороо л медальд хүрч, дэлхийд данстай бөх болж байна.

"Ташкент-2022" Дэлхийн аварга шалгаруулах тэмцээнд Манай улсаас 

1. -60кг Э.Ариунболд

2. -60кг Э.Сумьябазар

3. -66кг Г.Хэрлэн

4. -66кг Ё.Басхүү

5. -48кг Б.Баасанхүү

6. -48кг Г.Наранцэцэг

7. -52кг Б.Хорлоодой

8. 73кг Ц.Цогтбаатар

9. 81кг Б.Эрдэнэбаяр

10. 90кг Г.Алтанбагана

11. -100кг Б.Гончигсүрэн

12. +100кг О.Цэцэнцэнгэл

13. 57кг Л.Энхрийлэн

14. 57кг М.Ичинхорлоо

15. 63кг Б.Ганхайч

16. 70кг Ц.Энхчимэг

17. -78кг Б.Эрдэнэт-Од

18. +78кг А.Адьяасүрэн нарын бөхчүүд зодоглож байна.