Боловсрол, Шинжлэх Ухааны яамнаас дээд боловсролын салбарт хэрэгжүүлж байгаа зарим арга хэмжээний талаар мэдээлэл өглөө. 

Хичээлийн шинэ эхлэх гэж байгаатай холбогдуулаг хэд хэдэн бүтцийн өөрчлөлт хийж байгаа бөгөөд энэ жил 21 дээд боловсролын байгууллагын тусгай зөвшөөрлийг цуцалж байгаа талаар мэдэгдэв.  

Энэ талаар сайд Л.Энх-Амгалан "Өнгөрсөн 1.4 жилийн хугацаанд Монгол Улсын Засгийн газраас дээд боловсролын талаар авч хэрэгжүүлэх арга хэмжээний хүрээнд хоёр тогтоол гаргасан байгаа. Өнөөдрийн байдлаар дээд сургуулийн салбарт Монгол Улсад 147,000 оюутан 88 их, дээд сургуульд суралцдаг тооцоо байгаа. Үүнээс 14 их, дээд сургуульд 108,000 оюутан суралцаж байна. Цаашдаа бидний баримтлах бодлого нь шаардлага хангасан их, дээд сургуулиудтай байхад чиглэнэ.

Их дээд сургуулиудын бодлого хөдөлмөрийн зах зээлд уялдаггүй тул үүнд дээр тавих шаардлагыг өндөр болгоно. Төгсөгчид гараад ажлын байргүй болдог ийм нийтлэг зовлон байна.

Гэтэл хүүхэд дөрвөн жил дээд боловсрол эзэмшихийн тулд 12-15 сая төгрөг зарцуулдаг. Энэ нь ихэвчлэн дандаа зээлээр бүрддэг. Намар арилжааны банкуудаас тэтгэвэр, цалингийн зээл ихэвчлэн гардаг. Энэ нь сургалтын төлбөрт явдаг. 440-460 тэрбум төгрөгийн цалингийн зээл намар гардаг байна. Энэ их зээл гардаг ч төгсөгчид ажлын байргүй байна. Иймээс их, дээд сургуулийн шаардлагыг өндөр болгож байгаа юм.

Өнөөдрийн байдлаар Монгол Улсад 88 их, дээд сургууль үйл ажиллагаа явуулж байна. Үүнээс 34 их сургууль, 36 дээд сургууль, 8 коллеж байгаа юм. 

Засгийн газрын тогтоолоор 88 их, дээд сургууль нь 67 болж буурч байна.

Өөрөөр хэлбэл, 21 их, дээд сургуулийн сургалтын үйл ажиллагааг зогсоож байна. Мөн 24 их сургуульд зургаан сарын хугацаатай үүрэг өгсөн бөгөөд цаашид шаардлага хангахгүй бол дахин үйл ажиллагаагаа явуулах боломжгүй болно. 

Мөн 13 их, дээд сургуулийн үйл ажиллагааг зогсож байгаа. Нийт 163 багш, 1,567 оюутантай. Өөрөөр хэлбэл, 40 хүрэхгүй оюутантай, подвальд үйл ажиллагаа явуулдаг их, дээд сургуультай байж болохгүй.

Тиймээс энэ 13 их, дээд сургуулийн үйл ажиллагааг зогсоож байгаа юм. Нэг ч оюутны эрх ашгийг хөндөхгүй. Харин ч 1,500 гаруй оюутан нэр хүндтэй, эрэмбэ өндөртэй их, дээд сургуульд шилжин суралцах боломжийг бид олгож байна.

Манай их, дээд сургуулиудын сул тал нь хөдөлмөрийн зах зээлийн эрэлт, нийлүүлэлттэй уялддаггүй бодлого явуулдаг. Их, дээд сургууль төгссөн төгсөгчид маань ажилгүй болдог нийтлэг асуудал бий" гэлээ.