Эрүүл Мэндийн Яамнаас коронавируст халдварын нөхцөл байдлын талаар мэдээлэл хийлээ.

Улсын хэмжээнд өнгөрсөн хоногт хийсэн коронавирусийн 308 тохиолдол шинээр батлагджээ. Ингэснээр нийт бүртгэгдсэн халдварын тоо 935,360 болж байна.

Яамны мэдээллийн үеэр Эрүүл мэндийн сайдын зөвлөх О.Батбаяр шинэ давалгаатай холбоотойгоор хөл хорио тавихгүй харин иргэдийн хувийн хариуцлага руу чиглэсэн арга хэмжээнд чиглэнэ гэв.

Тэрээр "Манай улсын хувьд Омикроны BA.4, BA.5 хувилбар нь 10 орчим хувийг эзэлж байгаа. Энэ сарын сүүлчээр 80-90 хувь руу орно гэсэн мэдээллийг дотоодын судлаачид гаргаж өгч байна.

Омикроны BA.4, BA.5 хувилбар нь сүүлийн хувилбар биш гэдгийг олон улсын эрдэмтэд хэлж байна. Энэхүү давлагаа улс орнуудад 2-3 сар үргэлжилж байгаа.

Манай улсын хувьд 2021 оны долдугаар сараас хойш цар тахалтай зэрэгцэн орших бодлого явуулж эхэлсэн анхны улсуудын нэг. Тиймээс коронавирусийн шинэ давлагаа эхэлж байгаа ч хөл хорио тавихгүй. Сургууль хичээл, олон нийтийн үйл ажиллагаатай холбоотой хөл хорио тавихгүй ба бизнесүүдийг хумихгүй.

Харин иргэдийн хувийн хариуцлага руу чиглэнэ. Амны хаалт зүүх, хүүхэд болон ахмад настнууд анхаарал болгоомжтой байж олон нийтийн арга хэмжээнд оролцохгүй байхыг уриалж байна" гэлээ.