Ерөнхийлөгч Байден “АНУ Украин руу дахин нэг тэрбум долларын техник, зэвсэг илгээнэ” гэж мэдэгдээд байсан билээ.
Тэгвэл Украины тал АНУ-аас илгээсэн Harpoon пуужингаар Оросын Хар тэнгисийн флотын хөлгийг устгаж, живүүлснээ Украины армийн албан ёсны Телеграм хуудаснаа мэдээлжээ.
Энэ нь Барууны орнуудын илгээсэн зэвсгээр Оросын байлдааны хөлөг онгоцыг устгасан анхны тохиолдол юм.
Одесса мужийн цэргийн тойргийн командлагч Максим Марченко "Манай тэнгисийн хүчин Хар тэнгисийн чирэгч хөлөг Василий Бехийг устгалаа. Уг хөлөг агаарын довтолгооноос хамгаалах системээр тоноглогдсон байсан юм. Хөлөг живсэн нь сүүлд тодорхой болсон" хэмээн ярьжээ.
"Василий Бех" хөлөг Оросын цэргийн хяналтад байгаа Хар тэнгисийн Могойт аралд сум, зэр зэвсэг тээвэрлэн хүргэж явсныг Украины тал мэдээлсэн байна.
Украины арми мөн Хар тэнгисийн тулаанд бас өөрийн үйлдвэрийн Нептун пуужинг ашиглаж байгаа билээ.
