Болат Турлыхановын нэрэмжит бөхийн төрлүүдийн дэлхийн чансааг олгох тэмцээн Казахстаны Алматы хотод боллоо.

Үүнд манай улсаас чөлөөт бөхийн 10 тамирчин оролцож, амжилт дүүрэн байв.

Тэмцээний хоёр дахь өдөр Монгол Улсыг төлөөлөн дөрвөн эмэгтэй зодоглосноос гурав нь медаль хүртжээ. Тодруулбал,

• 68 кг-ын жинд 2021 оны Азийн аварга “Хилчин” спорт хорооны тамирчин ОУХМ З.Болортунгалаг мөнгө,

• 62 кг-д “Осло-2021” ДАШТ-ий хүрэл медальт, “Хилчин” спорт хорооны тамирчин ОУХМ Э.Гантуяа,

• 68 кг-д Азийн АШТ-ий нэг мөнгө, хошой хүрэл медальт “Хасу-Мегастарс” клубийн тамирчин ОУХМ Э.Дэлгэрмаа хүрэл медалийн эзэн болов.

Ц.Намуунцэцэг алтан медаль хүртэж, Монгол Улсын төрийн дууллаа эгшиглүүлэв

Харин тэмцээний гурав дахь өдөр эмэгтэйчүүдийн 50 кг-ын жинд насанд хүрэгчдийн Азийн АШТ-ий мөнгө, 23 хүртэлх насны ДАШТ-ий хүрэл медальт, Азийн аварга, "Хасу-Мегастарс" клубийн тамирчин ОУХМ Ц.Намуунцэцэг алтан медаль хүртэж Монгол Улсын төрийн дууллаа эгшиглүүлэв. Мөн энэ жинд "Осло-2021" ДАШТ-ий хүрэл медальт, "Женко" клубийн тамирчин ОУХМ Д.Отгонжаргал хүрэл медалийн төлөөх барилдаанд эзэн орны Светлана Анкичеваг 8:4-өөр ялж, медалийн тавцанд зогссон юм.

Б.Болортуяа энэ оны дөрөв дэх түрүүгээ хүртлээ

Түүнчлэн энэ өдөр "Токио-2020" олимпын наадам, "Нур-Султан-2019" ДАШТ-ий хүрэл медальт "Женко" клубийн тамирчин ОУХМ Б.Болортуяа Алматыгийн дэвжээнээс манайхны хоёр дахь алтан медалийг авчирсан. Түүний хувьд 2022 он гарснаас дөрөв дэх тэмцээндээ дараалан аваргалаад байна.

Харин эрэгтэй тамирчдаас 23 хүртэлх болон насанд хүрэгчдийн ДАШТ-ий хүрэл медальт, "Хилчин" спорт хорооны тамирчин ОУХМ М.Лхагвагэрэл Казахстанд 125 кг-ын жинд хүрэл медалийн эзэн болж, медалийн салхийг хагалав.

Т.Тулга Казахстанд аваргаллаа

Болат Турлыхановын нэрэмжит дэлхийн чансааны оноо олгох тэмцээний сүүлийн өдөр "Осло-2021" ДАШТ-ий хүрэл медальт, "Хүч" спорт хорооны тамирчин ОУХМ Т.Тулга 65 кг-ын жинд алтан медаль хүртэж, Монгол Улсын төрийн дууллаа эгшиглүүлэв. Тэрбээр 65 кг-д дэлхийн чансааны аман хүзүүнд бичигдэж буй бөгөөд Казахстанд түрүүлснээр жиндээ тэргүүлэх нь тодорхой болж байна.

Харин эрэгтэйчүүдийн 74 кг-ын жинд 23 хүртэлх насны ДАШТ-ий хүрэл медальт, "Сүлд" спорт хорооны тамирчин ОУХМ Б.Бямбадорж Казахстанаас мөнгөн медаль хүртлээ. 

Ийнхүү Болат Турлыхановын нэрэмжит цомын тэмцээнд манай улсаас 10 тамирчин оролцсоноос гурван алт, хоёр мөнгө, дөрвөн хүрэл, нийт есөн медальтай эх орондоо ирэхээр болов.

Mongolian Wrestling Federation