Олимп нь дэлхийн спортын хамгийн гол баярын нэг бөгөөд нөхөрсөг, жентельмен өрсөлдөөний наадам билээ. "Бээжин-2022" олимп өндөрлөөд упаагүй байна. Тун удахгүй паралимп эхлэх гэж байгаа. 

Ингээд уншигч та бүхэндээ олимпын наадмын хачирхалтай түүхээс танилцуулахаар бэлтгэлээ.

Олимп хуваасан нь

Хөлбөмбөгийн тив дэлхийн аваргыг хэдэн оронд хуваан явуулах нь ердийн үзэгдэл. Харин олимпын тоглолт энэ тал дээр хамаагүй хуучинсаг үзэлтэй. Зуны олимпын тоглолт түүхэндээ анх удаа 1956 онд хоёр оронд болсон байдаг.

Тэр жил наадмыг Мельбурн хүлээн авсан байсан бөгөөд тоглолт эхлэхээс нэг жилийн өмнө Австралийн эрх баригчид тус оронд амьтан оруулахыг хориглосон хуулиа өөрчлөхгүй гэж мэдэгдэж, олимпын морин спортын тоглолт тасрах шахжээ. Австралиас  олимпийг  өөр оронд шилжүүлэх асуудал ч үүссэн байна. Гэхдээ ОУОХ морин спортыг нь Стокгольмд явуулахаар болж асуудлыг шийдэж байжээ.

Хамгийн цуст тэмцээн

1956 оны Мельбурны олимп цус урсгасан тэмцээнээр бас түүхэнд үлджээ. Наадмын өмнө Зөвлөлтийн цэрэг Унгарын бослогыг цус урсган дарсан юм. Мельбурны усан пологийн нэг тоглолт улс төрийн утга агуулгатай болсон аж.

Хожим тогтоогдсноор Унгарын багийнхан Зөвлөлтийн багийг санаатайгаар өдөн хатгаж зодоонд хүргэжээ. Унгарын багийн ахлагч зөвлөлтийн Петр Мшвериерадзег цохин хамраас нь цус урсгав. Зөвлөлтийнхэн тэвчээд байв. Тоглолтын төгсгөл рүү 0:4 харьцаатай хожигдож байсан Зөвлөлтийн багийн Валентин Прокопов Эрвин Задорын хөмсгийг сэт цохин багуудын хооронд зодоон үүсгэжээ. Тэднийг цагдаа нар салгасан юм. Зарим үзэгчид усан сан руу нулимаж байжээ... Тоглолтыг дуусгаагүй ба Зөвлөлтийн багт хожигдол өгчээ. Унгарууд олимпын аварга болсон ба Зөвлөлийн баг гуравт шалгарч байжээ.

Жингээ хасах арга

"Токио-2020" зуны олимпын наадам (цар тахлын улмаас 2021 онд явагдсан) дээр 48,8 кг жинтэй Өмнөд Солонгосын жүдочин Кан Ю Чон  48 кг-ын жинд тоглохоор үсээ хусуулсан байв. Тэрээр хагас кг-аар илүү жинтэй байж болохыг мэдэж байсан ба жингээ хасахаар гүйж, хоол ундаа хасч байсан ч жин илүүдээд байж. Ингээд тэр үсээ бүрэн хусуулжээ. Ингээд жингээ тааруулсан ч тэр ихээхэн тамирдснаас эхний тоглолт дээрээ словенийн Маруша Штангарт ялагдсан юм.

"Тэг ковид" тал бүрийн хамгаалалт

Бээжингийн өвлийн олимп дээр тамирчид, төлөөлөгчдийн өрөөнд олимпын цагирагуудын өнгөтэй таван ширхэг бэлгэвчний багц тараажээ. Олимп бүр дээр бэлгэвч тараадаг учраас энэ нь сонин биш Японы олимпоор бас л бэлгэвч тараасан. Гэвч тэр нь размер жижигтэй хэмээн шүүмжлэл гарч байв. Харин Бээжинд үүнийг тооцоод хамгийн том размерийн бэлгэвч тараасан байна.

Мөсөн дээрх ид шид

2002 онд Солт-Лейк-Сити өвлийн олимпыг хүлээн авсан ба гол сонин нь Австралийн түүхэн эх өвлийн анхны алтан медаль. Түүнийг 1000 метрийн зайд уралдсан шорт трейкийн тамирчин Стивен Брэдбери Австралид авчирсан байв.

2002 онд Брэдбери хагас шигшээд канадын Марк Ганьон торгуулсны дараа шалгарсан байв. Финалд тэр сүүл барьж явсан ч эхлээд Хятадын Ли Цзяцюнь унав. Дараа нь түрүүлж явсан гурван тамирчин уналаа. Ингээд тэр аварга болжээ. Энэ ялалтын дараа "Австралид to bradbury"  буюу "чи өөрөө итгэхгүй байгаа ч ер бусын амжилт үзүүлэх" үйл үг зохиогджээ.

М.ЦОГТ