ЭХЭМҮТ-ийн Ерөнхий мэс заслын тасгийн эмч, мэргэжилтнүүд төрөөд долоо хонож буй нярайд төрөлхийн хэвлийн арын зайн хавдрыг дурангийн мэс заслын аргаар амжилттай авч, эмчилжээ. Уг хавдар нь 100 мянган амьд төрөлтөд нэг тохиолддог юм байна.
Мэс заслын дараа нярайн бие ямар байгааг тус тасгийн мэс заслын эмчээс тодруулахад, Хавдраа авахуулсан нярайг одоогоор эмнэлгийн хяналтад эмчилгээ үргэлжлүүлж байна. Бие нь сайжирч байна гэсэн юм.
Ерөнхий мэс заслын тасаг нь хүүхдэд бүх төрлийн мэс заслын тусламж үзүүлдэг улсын хэмжээний ганц тасаг бөгөөд тус тасгийн хамт олон 2022 онд нярайн мэс заслын эмчилгээнд онцгой анхаарал хандуулан ажиллах зорилт тавьжээ.
Ураг байхдаа хавдраар өвчилсөн нярайг төрсөн даруйд нь эрт илрүүлж, хавдрыг бусад эд эрхтэндээ үсэрхийлэхээс өмнө цаг алдалгүй мэс заслын тусламж үзүүлбэл цаашид хүүхдийн амьдралын чанарт сайнаар нөлөөлнө. Эрүүл хүүхдийн адил амьдрах боломж бүрдэх юм.
Тус тасгийнхан энэ долоо хоногт дөрвөн нярайн ураг байх үед үүссэн хавдрыг эмчилж, мэс заслын тусламж үзүүлэхээр төлөвлөжээ.
