Монголын Үндэсний олимпын хорооны Ерөнхийлөгчийн үүргийг түр орлон гүйцэтгэгч Ч.Наранбаатар Өвлийн олимпын тэтгэлэгт хамрагдсан тамирчдыг хүлээн авч уулзаж, тэтгэлэгийг гардууллаа.
Энэ үеэр түүнээс Өвлийн олимпын бэлтгэл, тамирчдын нөхцөл байдал болон Ерөнхийлөгчөө сонгох МҮОХ-ны чуулганы талаар тодрууллаа.
Тэрээр "2022 оны өвлийн олимп эхлэхэд 80 гаруй хоног үлдээд байна. Тус олимпод манай улсын цанын хоёр тамирчин эрхээ албан бусаар авсан байгаа. Дахиад нэг тамирчин эрх авах боломжтой. Мөн тэшүүр, биатлоны тамирчид эрх авахад ойрхон байна. Нийтдээ 7-8 тамирчин эрх авах боломжтой. Энэ бүхэн эрх авах тэмцээнээс шалтгаалах байх.
Өнөөдрөөс эхлэн өвлийн олимпод орох хувцасны загварууд гарлаа. Ойрын үед хувцсаа хийлгэнэ" гэлээ.
Мөн тэрээр "МҮОХ-ны чуулган товлосны дагуу Арваннэгдүгээр сарын 30-нд болно. Чуулганаар Ерөнхийлөгчөө сонгоно. Миний бие тус сонгуульд нэр дэвшихгүй" гэв.