Монголын Боксын холбооны Удирдах зөвлөлөөс гавъяат тамирчин Э.Цэндбаатарын хүсэлтийг хүлээн авч, ДАШТ-д оролцох тамирчныг тодруулах сорилго тэмцээнийг дахин зохион байгуулахаар болсон.
Сорилго тэмцээн өнөөдөр 13:00 цагт болох байсан бөгөөд Алдар нийгэмлэгийн тамирчин О.Тулга болон Э.Цэндбаатар нарын хооронд халз тулаан явагдаж, ялсан нь ДАШТ-д явах байв.
Дүрмийн дагуу тамирчид өнөөдөр 07:00-08:00 цагийн хооронд эрүүл мэндийн үзлэгт орох ёстой байсан ч МУГТ Э.Цэндбаатар эрүүл мэндийн үзлэгтээ ирээгүй байна. Харин ОУХМ О.Тулга жиндээ тэнцжээ.
Энэхүү халз тулаан өнөөдөр Эрдэнэт хотын Сэлэнгэ амралтын баазад болох байсан юм.
Эрүүл мэндийн үзлэгийн цаг хаагдсаны дараа Боксын холбооны Ерөнхий нарийн бичгийн даргаас тэмцээний шүүгчээр ажиллах байсан Ц.Батнасанд мессеж ирсэн бөгөөд тухайн мессежид Д.Цэндбаатарын багш Б.Энхтайван "Бид хоёр маргаашийн сорилд оролцох боломжгүй боллоо" гэсэн байжээ.
Харин ОУХМ О.Тулга "Дэлхийн аварга шалгаруулах тэмцээнд Монголынхоо нэрийг гаргахын төлөө хичээнэ, маш том хариуцлага надад ирлээ. Би есдүгээр сарын 6-наас хойш жингээ барьж байна. Тэмцээнд оролцох эрхээ авсандаа баяртай байна. Өнөөдрөөс бэлтгэлдээ орно" гэлээ.
