Мэргэжлийн сүмогийн түүхэнд хамгийн олон рекордыг тогтоож, эзэмшсэн Их аварга Ёкозүна Хакүхо М.Даваажаргал өвдөгний бэртлийн улмаас зодог тайлахаар шийдвэрлэсэн байна.
Энэ талаар Японы сонин, хэвлэлүүд нийтэлж эхэлжээ.
Никкан спорт зэрэг спортын сонин болон телевизийн сувгуудаар баталгаатай эх сурвалжаас авсан мэдээлэл хэмээн нийтлэлийг цацаж байгаа аж.
Хакүхо М.Даваажаргал Долдугаар сарын тэмцээнд өвдөг шороодолгүй түрүүлсэн ч өвдөгний гэмтэл бүрэн эдгээгүй байсан юм. Мөн намрын тэмцээнд зодоглоно гэж байсан ч дэвжээнд нь коронавирусийн халдвар гарсан тул барилдаагүй байна.
Дашрамд, хүчирхэг, дайчин барилдаант Хакүхо М.Даваажаргал нь нийт 45 түрүү, 1187 даваа, дээд зиндаанд 1093 ялалт, Ёкозүна цолтой 84 башё зэрэг мэргэжлийн сүмо бөхийн маш олон рекордыг шинэчлэн тогтоосон Их аварга. Мөн тэрээр Монгол, Японы найрамдалт харилцааны гүүр болсон эрхэм нэгэн билээ.